ඉස්‌සර මැතිවරණ කරන්න ජවිපෙට මුදල් තිබුණෙ නෑ. සමහර විට අපි මැතිවරණ කළේ අපේ සහෝදරයන්ට අයිතිව තිබූ වාහන දෙක තුනක්‌ විකුණලා. නමුත් මෙවර ජවිපෙ හැම දිස්‌ත්‍රික්‌කයකටම වාහන දීලා ලොකු වියදමක්‌ කරලත් දිනාගත හැකි වූයේ මන්ත්‍රී ධුර 6 ක්‌ පමණයි. ජවිපෙ නායක අනුර කුමාර දිසානායක මහතා අද ඒ ගැන ආඩම්බරයෙන් කතා කරන්නෙ ජවිපෙ මෙරට පාර්ලිමේන්තුවේ ආසන 41 ක්‌ හිමිකරගෙන තිබූ බව අමතක කරලයි. ජවිපෙට මුදල් නැති බව අපි දන්නවා. එහෙම නම් මෙවර මැතිවරණයේදී විශාල මුදලක්‌ වියදම් කරන්න අනුර කුමාර සහෝදරයාට මුදල් ලැබුණේ කොහොමද කියල ජනතාවට හෙළි කළ යුතුයි. අද ජවිපෙ පැරැණි වාමාංශික දේශපාලන පක්‌ෂයක තත්ත්වයට පත් වෙලා. ජනතාව දැන් ඒ පක්‌ෂය ප්‍රතික්‌ෂේප කරනවා.
මෙවර මැතිවරණයෙන් පසු එක්සත් ජනතා නිදහස්‌ සන්ධාන ජාතික ලැයිස්‌තුවෙන් වාමාංශික පක්‌ෂවලට අවස්‌ථාව ලබානොදීම ජනාධිපති මෛත්‍රීපාල සිරිසේන මහතා ගනු ලැබූ බුද්ධිමත්ම තීරණයක්‌. ජනතා ඡන්දයෙන් පාර්ලිමේන්තුවට එන්න බැරි වාමාංශික පක්‌ෂ කාගේ පිහිටෙන් හරි පාර්ලිමේන්තුවට ඇවිල්ල කළ එකම දෙය තමයි මේ රට විනාශ කිරීම. ඒ අවස්‌ථාව අහෝසි කිරීම මේරටේ ජනතාවගේ වාසනාවක්‌ බවද ඔහු සඳහන් කළේය.
අපේ රටේ වාමාංශික ව්‍යාපාර සියල්ල දැන් අහෝසිවෙලා. ධනපති ගැති පිරිසක්‌ තමන් වාමාංශිකයන් යෑයි හඳුන්වා ගන්නවා. මේ අවසනාවන්ත තත්ත්වය ඉවරයක්‌ කරන්න. ජනාධිපතිතුමා කටයුතු කිරීම ප්‍රශංසාවට ලක්‌ විය යුතු යෑයිද ඒ මහතා කීවේය.
සෝමවංශ අමරසිංහ මහතා මේ බව සඳහන් කළේ ඊයේ (24 දා) කොළඹ පැවැති මාධ්‍ය හමුවකදීය.
divaina
