රජයෙන් ඉන්ධන දීමනාව ලබන මැති ඇමැතිවරුන් හෝ වෙනත් රාජ්‍ය නිලධාරීන් විදේශගත වූ අවස්ථාවක ඔවුන්ට කිසිසේත් ඉන්ධන දීමනාව හිමි නොවෙයි.
කෙහෙළිය රඹුක්වැල්ල මහතා 2012 ජනවාරි 29 වැනි දින සිට 2012 මැයි මස 25 වැනිදා දක්වා දිවයිනෙන් බැහැරව සිට ඇත. එම කාලය තුළ පාර්ලිමේන්තුවට නොපමිණීමේ අවසරය 2012/03/06 වැනි දින පාර්ලිමේන්තු සභානායකවරයා වෙත ලිපියක් ඉදිරිපත් කරමින් ඉල්ලා තිබේ.
එසේ නීත්‍යානුකූලව අවසරය ලබා තිබියදී කෙහෙළිය රඹුක්වැල්ල මහතා මෙරට සිටින කෙනෙකුට හිමි ආකාරයෙන් ඉන්ධන දීමනාව ලබාගැනීම වංචාවක් බව රාජ්‍ය විගණනය පෙන්වා දෙයි.
රඹුක්වැල්ල මහතා විදෙස්ගතව සිටියදී ඒ මහතාගේ කාර්ය මණ්ඩලය විවිධ රාජකාරීවල යෙදුණු බව පවසා ඒ මහතාගේ පෞද්ගලික ලේකම් බ්‍රිගේඩියර් ජයවර්ධන මහතා ජනමාධ්‍ය හා ප්‍රවෘත්ති අමාත්‍යාංශයේ ලේකම්වරයා වෙත ලිපියක් යවමින් එම ඉන්ධන දීමනා ලබාදෙන ලෙසට ඉල්ලීමක් කර ඇත.
රජයේ මැති ඇමැතිවරුන්ගේ විදුලි බිල රජයෙන් ගෙවනු ලබන අතර 2014 මාර්තු මාසයේ කෙහෙළිය ඇමැතිවරයාගේ නිවසේ විදුලි බිල දෙලක්ෂ දහතුන්දහස් තුන්සිය පනස් පහක් වශයෙන් ගෙවා තිබේ.
මීට අමතරව කෙහෙළිය රඹුක්වැල්ල මහතාගේ නිල නිවසේ සිටි බව කියන කිනිතුල්ලන් මර්දනය කිරීමට තලවතුගොඩ ප්‍රදේශයේ ආයතනයක් වෙත රුපියල් හැත්තැඅටදහසක්ද රජයේ මුදලින් ගෙවා ඇති බව බිල්පත් ලිපි ලේඛන සහිතව අනාවරණය වී ඇත.
ඒ මහතා අනතුරකට ලක්ව රෝගාතුරව විදෙස්ගතව ප්‍රතිකාර ලබමින් සිටියදී එම ප්‍රතිකාර කටයුතු සඳහා ජනාධිපති අරමුදල රුපියල් එක්කෝටි අසූලක්ෂයක් පමණ ගෙවා තිබියදී හිමිනැති ඉන්ධන දීමනාද ලබාගෙන ඇත.
