නීතිපතිවරයා වෙනුවෙන් අභියාචනාධිකරණය හමුවේ එම ප්‍රකාශය කරමින් නියෝජ්‍ය සොලිසිටර් ජනරාල් අර්ජුන ඔබේසේකර මහතා කියා සිටියේ ‘වරාය නගරය’ ඉදිකිරීම මුල් අදියර ආරම්භ කොට ඇත්තේ ‘පරිසර වාර්තා ලබාගැනීමෙන් පසුව‘ බවත් හෙළිදරව් කළේය.
ඒ කෙසේ නමුත් මේ වන විටත් මෙම වරාය නගරය හේතුවෙන් වැල්ලවත්ත - ගල්කිස්ස වෙරළ තීරය දැඩි මුහුදු කෑමකට ලක්ව ඇති අතර නුදුරේම මුහුදු බඩ දුම්රිය මාර්ගයද මුහුදුට බිලිවනු ඇති බවට පරිසරවේදීන් මත පළ කර සිටී.
සභාපති විනිසුරු විජිත් කේ. මලල්ගොඩ හා විනිසුරු එච්. සී. ජේ. මඩවල යන ද්විපුද්ගල අභියාචනාධිකරණ විනිසුරු මඩුල්ල හමුවේ නීතිපතිවරයා මෙලෙස ප්‍රකාශකරනු ලැබුවේ ඒ පිළිබඳව ගොනුකොට ඇති රිට් පෙත්සම ඉදිරිපත්වූ අවස්ථාවේදීය.
කොළඹ ‘වරාය නගරය’ ඉදිකිරීම නතර කරන ලෙස ඉල්ලා මෙම පෙත්සම ගොනුකරන ලද්දේ ‘පරිසර යුක්තිය’ සඳහා වූ කේන්ද්‍රය’ නම් රාජ්‍ය නොවන සංවිධානයක් විසිනි.
පෙත්සමෙහි වගඋත්තරකරුවන් ලෙස ශ්‍රී ලංකා වරාය අධිකාරිය, වෙරළ සංරක්ෂණ අධිකාරිය හා එහි අධ්‍යක්ෂ ජනරාල්වරුන්ද, මධ්‍යම පරිසර අධිකාරිය සහ සීමාසහිත චයිනා හාබර් ඉංජිනියරිං සමාගමද නම්කොට ඇත.
හෙක්ටයාර් 300 ක පමණ මුහුදු ප්‍රදේශයක් ගොඩකරමින් මෙම වරාය නගරය ඉදිකරීම සඳහා අවසර ලබාගෙන ඇතත් එම ප්‍රමාණය දෙගුණයක් දක්වා වැඩිකරමින් හෙක්ටයාර් 575 ක් මුහුදු ප්‍රදේශය ගොඩකිරීමට වගඋත්තරකරුවන් ක්‍රියාකර ඇති බවද පෙත්සම්කරු සිය පෙත්සමෙන් ප්‍රකාශ කොට තිබිණි.
පෙත්සම් විභාගයේදී අභියාචනාධිකරණය හමුවේ වැඩිදුරටත් කරුණු දැක්වූ නියෝජ්‍ය සොලිසිටර් ජනරාල් අර්ජුන ඔබේසේකර මහතා කියා සිටියේ වරාය නගරය දෙවන පියවර ආරම්භ කිරීම සඳහා අවශ්‍ය පාරිසරික වාර්තා ලබාගත යුතුව ඇති බවත් එම වාර්තා ද ලබාගෙන ඉදිරි කටයුතු පවත්වාගෙන යාමට රජය බලා‍පොරොත්තු වන බවත්ය.
වරාය ඉදිකිරීමෙන් වන පරිසර හානිය සම්බන්ධයෙන් වාර්තාවක් සකස්කළ පරිසර්වේදී කතිකාචාර්ය රවීන්ද්‍ර කාරියවසම් මහතාගෙන් අප කළ විමසීමක්දී ඔහු පවසා සිටියේ මෙම ව්‍යාපෘතිය යළි ආරම්භ කිරීමට ගන්නා උත්සාහයත් මේවන විට සිදුව ඇති පරිසර විනාශය තවදුරටත් ව්‍යාප්තවීම වැලැක්වීම වෙනුවෙනුත් ජනතාව සමඟ එක්ව ක්‍රියාමාර්ග ගැනීම සිදුවියයුතු බවය. ඉදිරියේදී මේ සම්බන්ධයෙන් ජනතාව දැනුවත් කිරීම සිදු කරන බවය.
එමෙන්ම මෙම ව්‍යාපෘතියේ න් සිදුවන හානිය රටේ ජනතාවගෙන් වසන් කිරීම සඳහා ඇතැම් මාධ්‍ය ආයතන ගෙන යන වැඩ පිළිවෙලද හෙළිදරව් කළ යුතු බවද හෙතෙම අවධාරණය කළේය.
සබැදි පුවත්
වරාය නගරයේ ඉදිකිරීම් හේතුවෙන් මුහුදු කෑම උග්‍ර වෙලා
