කෙසේ වෙතත් ජනතාවට සහනදීමට රජය ගත් තීරණය අනුව පෙට්‍රල් සහ ඩීසල් මිල ඉහළ නොදමා යම්කිසි ක්‍රමවේදයක්‌ හරහා අදාළ පාඩුව මහා භාණ්‌ඩාගාරය හරහා පියවීමට රජය තීරණය කර ඇත.
පසුගියදා ඉන්ධන මිල කැපී පෙනෙන ලෙස අඩු කළද ඒ සඳහා අය කෙරෙන බදු පහත නොදැමීම හේතුවෙන් සංස්ථාවට දැඩි මූල්‍ය අලාභයක් සිදුව ඇති බව ඛනිජතෙල් සංස්ථා ආරංචි මාර්ග පවසයි.
ඔක්ටේන් 92 වර්ගයේ පෙට්‍රල් ලීටරයකින් රුපියල් 21කට අධික අලාභයක්ද ඔක්ටේන් 95 වර්ගයේ පෙට්‍රල් ලීටරයකින් රුපියල් 15 කට අධික අලාභයක් ද සිදුවන බව සඳහන්ය. රුපියල් 65කට අලෙවි කරන භූමිතෙල් ලීටරයකින් රුපියල් 16කට අධික අලාභයක් සිදුවන බවද ඩීසල් ලීටරයකින් රුපියල් 15 ක පමණ පාඩුවක්‌ ද විඳීමට තෙල් සංස්ථා ආරංචි මාර්ග පවසයි.
.
2002-2003 වසරවල තෙල් මිල ක්‍රියාත්මක කළ ''මිල සූත්‍රය'' යළිත් ක්‍රියාත්මක කිරීමට රජයේ අවධානය යොමුව ඇති අතර ඒ අනුව ලෝක වෙළෙඳ පොළේ තෙල් මිල උච්චාවචනය වන ආකාරයට මාසෙන් මාසයට මෙරට ඉන්ධන මිල ඉහළ පහළ දැමීමට අවධානය යොමු කර ඇත.
ලංකා ඛනිජ තෙල් සංස්ථාව ලංකා බැංකුවට හා මහජන බැංකුවට රුපියල් බිලියන 375 ක්‌ ණය බරව සිටින අතර ඒ හා සැසඳීමේදී පසුගිය මාස තුනේදී සිදුව ඇති රුපියල් බිලියන හතරක පාඩුව විශාල එකක්‌ නොවන බව එම සංස්ථාවේ නිළධාරීන් පවසයි.
පසුගිය වසර පහළොවක විස්‌සක කාලයේදී සපුගස්‌කන්ද තෙල් පිරිපහදුව නවීකරණය නොකිරීම, ගබඩා පුළුල් නොකිරීම, තෙල් නළ අලුත්වැඩියා නොකිරීම නිසා ගැටලු රැසක්‌ පැන නැගී ඇති අතර එම කටයුතු සඳහා දස අවුරුදු සැලසුමක්‌ කැබිනට්‌ මණ්‌ඩලයට ඉදිරිපත් කර තිබේ.
