මේ පිළිබඳ විවාදය පසුගිය 21 හා 22 දිනවල පැවැත්වීමට නියමිතව තිබුනද පාර්ලිමේන්තුවේ විපක්ෂ මන්ත්‍රීවරුන් පිරිසක් සභා ගර්භයේ ඇතුළත විරෝධතාවක් නිසා නියමිත පරිදි විවාදය ආරම්භ කිරීමට නොහැකි විය. එබැවින් එම විවාදය 27 හා 28 දිනයන්ට කථානායකවරයා විසින් කල්දමා තිබුණි.
මෙවරද සංශෝධය සම්මත වීම වැලැක්වීම සඳහා මහින්ද වාදී මන්ත්‍රීවරු යම් ක්‍රියාමාර්ගවලට එළඹීමට උත්සහ කරනු ඇතැයි දේශපාලන තොරතුරු කරුවෝ අනාවැකි පළ කරති. මේ අතර දහනව වැනි ආණ්ඩුක්‍රම ව්‍යවස්ථා සංශෝධනය සම්මතවන තුරු අධිෂ්ඨාන සත්‍යක්‍රියාවක නිරතවීමට පූජ්‍ය මාදුළුවාවේ සෝභිත හිමියෝ ප්‍රමුඛ සාධාරණ සමාජයක් සඳහා වූ ජාතික ව්‍යාපාරයේ හිමිවරු තීරණය කරති.
මේ සත්‍යක්‍රියාව කොළඹ පිහිටි නිදහස් චතුරස්‍රයේ දී අද ආරම්භ කිරීමට නියමිත බව සාධාරණ සමාජයක් සඳහා වූ ජාතික ව්‍යාපාරය පවසයි.
මේ පනත් කෙටුම්පතින් ලැබෙන ජනතා සුබසිද්ධිය සළකා එය සාර්ථක වේවායි ප්‍රාර්ථනා කරමින් මෙය පවත්වන බවද එම ව්‍යාපාරය කියයි.
