චීන සමූහ ආණ්ඩුවේ විශේෂ ආරාධනයක් අනුව ජනාධිපතිවරයා සිව්දින නිළ සංචාරයක් සඳහා ඊයේ පස්වරුවේ දිවයිනෙන් පිටත්ව ගියේය.
ජනාධිපති මෛත්‍රීපාල සිරිසේන මහතා ප්‍රමුඛ මෙරට දූත පිරිස චීනයේ විදේශ කටයුතු පිළිබඳ නියෝජ්‍ය අමාත්‍යවරයා ප්‍රමුඛ පිරිසක් විසින් හරසරින් පිළිගෙන ඇත.
ජනාධිපතිවරයා පිළිගැනීමේ නිල උත්සවය අද චීන ජනාධිපති ෂී ජින් පින් මහතාගේ ප්‍රධානත්වයෙන් චීන මහජන ශාලාවේදී පැවැත්වීමට නියමිතය.
දෙරටේ නායකයින් අතර ද්වී පාර්ශ්වික සාකච්ඡා පැවැත්වීමටද නියමිත බව ජනාධිපති මාධ්‍ය අංශය පැවසුවේය.
එමෙන්ම දෙරට අතර ගිවිසුම් කිහිපයකටද අත්සන් තැබීමට නියමිතය.
චීන ජනාධිපතිවරයා විසින් ජනාධිපති මෛත්‍රීපාල සිරිසේන මහතා වෙත විශේෂ දිවා භෝජන සංග්‍රහයක්ද සංවිධානය කර ඇත.
ජනාධිපති මාධ්‍ය ඒකකය පැවසුවේ, ජනාධිපති මෛත්‍රීපාල සිරිසේන මහතා චීන අගමැති ලීක්වෑන්ග් මහතා මෙන්ම චීන මහජන ජාතික කොංග්‍රසයේ විධායක කමිටු සභාපතිවරයා සමග ද ද්වීපාර්ශවික සාකච්ඡා පැවැත්වීමට නියමිත බවය.
