අධිකරණය මෙම පෙත්සම් භාර ගැනීම ප්‍රතික්ෂේප කිරීම හෝ ඒ විභාගයේදී පරාජය වීම හෝ සිදු වු විට අධිකරණය ආණ්ඩුවේ දේශපාලන වුවමනාවන් වෙනුවෙන් පෙනී සිටින බව පෙන්වා දී එමඟින් ආණ්ඩුව අහිකරණයේ ස්වාධිනත්වය කෙළෙසා ඇතැයි ප්‍රචාරයන් ගෙන යාමත් ඒ මුල් කරගෙන මෙම ආණ්ඩුව ප්‍රතික්ෂේප කළ යුතු යැයිද කියමින් ප්‍රචාරයක් ගෙන යාම මෙම සැලසුමේ අරමුණය.
මේ අතර පාර්ලිමේන්තු අනුමැතියට ඉදිරිපත් කර ඇති 19 වැනි ආණ්ඩුක්‍රම ව්‍යවස්ථා සංශෝධන පනත් කෙටුම්පතෙහි ඇතුළත් ව්‍යවස්ථා කිහිපයක් මෙරට ආණ්ඩුක්‍රම ව්‍යවස්ථාවට පටහැනි බැවින් එම පනත් කෙටුම්පත තුනෙන් දෙකේ බහුතරයකින් සහ ජනමත විචාරණයකින් සම්මත කර ගත යුතු බවට තීරණය කරන ලෙස ඉල්ලා ශ්‍රේෂ්ඨාධිකරණයට පෙත්සම් 3 ක් ඉදිරිපත් කර තිබේ.
පිවිතුරු හෙළ උරුමයෙහි මහලේකම් උදය ගම්මන්පිල, ජ්‍යෙෂ්ඨ නීතිඥ ගෝමීන් දයාශ්‍රී, ලියන පතිරණගේ අයිවන් පෙරේරා යන මහත්වරු විසින් මෙම පෙත්සම් ඉදිරිපත් කර ඇත. මෙම යෝජිත 19 වැනි ආණ්ඩුක්‍රම ව්‍යවස්ථා පනත් කෙටුම්පතෙහි 70 (1) ව්‍යවස්ථාව මඟින් පාර්ලිමේන්තුව විසුරුවා හැරිය හැකි කාලසීමාව වසරේ සිට වසර හතරහමාර තෙක් වැඩිකර ඇත. එමඟින් ජනතාවට සිය ඡන්දය භාවිත කිරීමට ඇති අයිතිය උල්ලංඝණය වන බව ජනාධිපති නීතිඥ ගෝමින් දයාශ්‍රී මහතා ඉදිරිපත් කළ පෙත්සමෙහි සඳහන් වේ.
එසේම විධායක ජනාධිපති ධුරයේ බලතල අඩු කරමින් 33 (අ) ව්‍යවස්ථාව ඉදිරිපත් කර ඇත. 14 (1) අ ව්‍යවස්ථාව මඟින් රජයේ බලතල සීමා කර තිබේ. එමඟින් මෙරට ජනතාවගේ මූලික අයිතීන් උල්ලංඝනය වන බව එම පෙත්සමෙහි දැක්වේ.
මෙම 19 වැනි ආණ්ඩුක්‍රම ව්‍යවස්ථා සංශෝධන පනත් කෙටුම්පතෙහි 1 සිට 54 තෙක් වන ව්‍යවස්ථා ආණ්ඩුක්‍රම ව්‍යවස්ථාවට පටහැනි බව පිවිතුරු හෙළ උරුමයේ මහ ලේකම්, බස්නාහිර පළාත් සභා මන්ත්‍රී උදය ගම්මන්පිල මහතා ගොනුකළ පෙත්සමෙහි සඳහන් වේ.
19 වැනි ආණ්ඩුක්‍රම ව්‍යවස්ථා සංශෝධන පනත් කෙටුම්පතෙහි 2 වැනි ව්‍යවස්ථාව ආණ්ඩුක්‍රම ව්‍යවස්ථාවේ 10 ව්‍යවස්ථාවට පටහැනි බවට එල්. පී. අයිවන් පෙරේරා මහතා ගොනුකළ පෙත්සමෙහි සඳහන් වේ.
එබැවින් මෙම සංශෝධිත පනත් කෙටුම්පත පනතක් වීමට නම් පාර්ලිමේන්තුවේ 2/3 ක බහුතරයකින් ද ජනමත විචාරණයකදී මෙරට ජනතාව විසින් ද සම්මත කර ගත යුතු බවට තීරණය කරන්නැයි මෙම පෙත්සම් මඟින් ඉල්ලා තිබේ.
