2007 වසරේදී යේමන ජාතිකයකු ඝාතනය කිරීම සම්බන්ධයෙන් 2014 නොවැම්බර් මාසයේදී සවුදි අධිකරණය විසින් මෙම ශ්‍රී ලාංකිකයන් තිදෙනාට එරෙහිව මරණ දඬුවම නියම කළ බව කී ඇමැතිවරිය මෙරට මැතිවරණ වාතාවරණයත්, සවුදි රජුගේ මරණයත් නිසා ඒ පිළිබඳ විදේශ රැකියා අමාත්‍යාංශයේ වගකීම පමාවූ බවද කීවාය.
පසුගිය රාජපක්ෂ පලන සමයේදී මහත් ආන්දෝලනයකට තුඩුදුන් රිසානා නෆික්‌ තරුණිය බේරා ගන්නා බවට එම පාලකයෝ කට මැත දෙඩවූවද ඇයව ඝාතනය කරන තුරුත් කිසිදු පියවරක් ගැනීමට ඔවුන් අසමත් විය. මේ සම්බන්ධයෙන් පාර්ලිමේන්තුවේදී එවකට විදේශ රැකියා කටයුතු ඇමැතිවරයා වු ඩිලාන් පෙරේරා මහතා විසින් විපක්ෂයේ ප්‍රශ්න කිරීමකට පිළිතුරු දෙමින් අනිවාර්යෙන්ම රිසානා බේරා ගන්න බවට සහතික කරන විටත් ඇයව ඝාතනය කර තිබිණි. ඒ බව වත් ඔහු දැන සිටියේ නැත.
ඒ කෙසේ වෙතත් මේ වන විට තානාපතිවරයා හරහා තම අමාත්‍යාංශ විසින් මූලික සාකච්ඡා සිදුකර ශ්‍රී ලාංකිකයන් තිදෙනාගේ හිස සිඳ දැමීමේ දඬුවම ලේ වන්දිය දක්‌වා අඩුකර ගැනීමට හැකියාව ලද බවද ඇමැති තලතා අතුකෝරළ මහත්මිය ප්‍රකාශ කළාය.
ඝාතනයට ලක්‌වූ යේමන් ජාතිකයාගේ සහෝදරයා විසින් විත්තිකාර ශ්‍රී ලාංකිකයන්ගේ මරණ දඬුවම ලිහිල් කර වන්දියක්‌ ලබාගැනීමට එකඟ වූ බවද එහෙත් එම වන්දි මුදල කොපමණද යන්න එරට අධිකරණය මගින් තීරණය කළ යුතුව ඇතැයිද කී අතුකෝරළ මහත්මිය ඕනෑම අවස්‌ථාවක තම දරුවන් දැක බලා ගැනීම සඳහා සවුදියට යාම සඳහා එම ශ්‍රී ලාංකිකයන් තිදෙනාගේ දෙමව්පියන්ට පහසුකම් ලබාදුන් බවද කීවාය.
කෙසේ වෙතත් මෙම වරදකරුවන් තිදෙනාට සිරදඬුවමක්‌ අනිවාර්යයෙන්ම හිමිවන බව කී අතුකෝරළ මහත්මිය එම සිරදඬුවම එරටේ ලබා දෙනවාද, ශ්‍රී ලංකාවේ බන්ධනාගාරයක ලබා දෙනවාද යන්න පිළිබඳ මෙතෙක් තීරණයක්‌ ගෙන නැතැයිද කීය.
