ඔවුන් පවසන්නේ පාසල්වල මුදල් අය කිරීම නැවැත්වීමට ගෙන ආ චක‍්‍රලේඛයෙන් සිසුන්ගෙන් ගාස්තු අය කිරීම නීතිගත කර ඇති බවය.

මේ සම්බන්ධව ඔවුන් නිකුත් කළ නිවේදනයේ මෙසේ සදහන්ය.

''නව තාවකලික ආණ්ඩුවේ අධ්‍යාපන ඇමති අකිල විරාජ් මහතා මාධ්‍ය සංදර්ශන පවත්වමින් කියා සිටියේ පාසල් වල සිදු කරන අනවශ්‍ය මුදල් අය කිරීම වහා නවතන බවයි. එසේ ප‍්‍රකාශ කරමින් 2015.1.28 වන දින ̃පාසැල් වල අවිධිමත් මුදල් අයකිරීම තහනම් කිරීම ලෙස නව චක‍්‍රලේඛයක් නිකුත් කර තිබේ. මෙම චක‍්‍රලේඛය මඟින් මෙතෙක් පාසල් තුල සිදු කල මුදල් එකතු කිරීමේ ක‍්‍රියාවලිය නීත්‍යානුකූල කර ඇත. මෙම ඊනියා චක‍්‍රලේඛයේ 5 වන වගන්තියෙන් පාසල් තුල අත්‍යවශ්‍ය මුදල් ලෙස නම් විදුලි බිල්, ආරකෂක හා දුරකථන බිල් ආදී හේතුන් වලට මුදල් එකතු කර ගත හැකි බව පවසා ඇත. 6 වන වගන්තියෙන් එම මුදල් අය කරගන්න විදිය පවසා ඇත. 7 වන වගන්තියෙන් මුදල් ගෙවීමට නොහැකි සිසුන්ට ග‍්‍රාම සේවක සහතිකයක් ඉදිරිපත් කර මුදල් නොගෙවිය හැකි බව පවසා ඇත. මෙමගින් පාසල් තුලම මුදල් අය කිරීම නිත්‍යානුකූල කර තිබේ.''

මෙම ඊනියා චක්‍ර ලේඛනය හකුළා ගන්නා තෙක් දිගින් දිගටම අඛණ්ඩව සටන් සිදු කරන බව අන්තර්විශ්වවිද්‍යාලීය ශිෂ්‍ය බල මණ්ඩලය පවසයි.