තෙදින නිල සංචාරයක් සඳහා මෙරටට පැමිණි පොදු රාජ්‍ය මණ්ඩලයීය මහලේකම්වරයා ඊයේ (02)පස්වරුවේ ජනාධිපති කාර්යාලයේදී ජනාධිපති මෛත‍්‍රීපාල සිරිසේන මහතා හමුවූ අවස්ථාවේදී මේ බව ප‍්‍රකාශ කළේය.
කොමිෂන් සභා පත් කිරීම, මාධ්‍ය නිදහස තහවුරු කිරීම, මන්ත්රී ආචාර ධර්ම පද්ධතියක් හඳුන්වා දීම, තොරතුරු දැන ගැනීමේ පනත ඉදිරිපත් කිරීම ඇතුළු පොදු රාජ්‍ය මණ්ඩලයේ යෝජනා රැසක් නව රජයේ දින සියයේ වැඩපිළිවෙලට ඇතුළත්ව තිබීම ඉතා හොඳ තත්ත්වයක් බව ඔහු පවසා ඇත. පසුගිය ජනාධිපතිවරණය සාමකාමී සහ ප‍්‍රජාතන්ත‍්‍රවාදී අයුරින් අවසන් කර නව පාලන තන්ත‍්‍රයක් රට තුළ ඇති කිරීමට කටයුතු කිරීම පිළිබඳව ද මෙහිදී මහලේකම්වරයා ස්තූතිය පළ කර අැත. එහිදී නිරීක්ෂණ කටයුතු සඳහා පොදු රාජ්‍ය මණ්ඩලයේ නියෝජිතයින් සහභාගී වූ අතර මැතිවරණ කොමසාරිස්වරයා අතර ද නිරන්තර සාකච්ඡා පවත්වමින් ලබා දුන් දායකත්වය ද ඔහු සිහිපත් කර ඇති බව ජනාධිපති මාධ්‍ය ඒකකය නිවේදනය කලේය.
පොදු රාජ්‍ය මණ්ඩලයීය ආරම්භක සාමාජිකයෙකු ලෙස පොදු රාජ්‍ය මණ්ඩලයීය සබඳතා තවදුරටත් ශක්තිමත් කර ගැනීමට ලැබීම පිළිබඳ සතුටුවන බව මෙහිදී අදහස් දැක්වූ ජනාධිපති මෛත‍්‍රීපාල සිරිසේන මහතා පෙන්වා දුන්නේය. ශ‍්‍රී ලංකාවට අන්තර්ජාතික සබඳතා ඉතා වැදගත් බව පෙන්වා දුන් ජනාධිපතිවරයා පොදු රද මඩුලූ සහාය තුළින් එම සබඳතා තවදුරටත් ශක්තිමත් වනු ඇතැයි ද පවසන ලදී. යුද්ධය නිමවීමත් සමග අභියෝග රැසක් මතුව තිබෙන බැවින් ජනතාව අතර විශ්වාසය දැඩි කර අනවබෝධය දුරු කිරීමට කටයුතු කළ යුතු බවත්, ඊට පොදු රාජ්‍ය මණ්ඩලයේ සහාය අපේක්ෂා කරන බවත් ජනාධිපති මෛත‍්‍රීපාල සිරිසේන මහතා මෙහිදී වැඩිදුරටත් පෙන්වා දුන්නේය. මීළග පොදු රාජ්‍ය මණ්ඩලයීය සමුළුව මෝල්ටා රාජ්‍යයේ පැවැත්වෙන අතර ඊට ශ‍්‍රී ලංකා ජනාධිපති ප‍්‍රමුඛ නව රජයේ සහාය අපේක්ෂා කරන බවද කමලේෂ් ෂර්මා මහතා එහිදී පවසා අැත.
