රජයේ ප්‍රවෘත්ති දෙපාර්තමේන්තුවේ ඊයේ පැවැති මාධ්‍ය හමුවකදී වැඩිදුරටත් අදහස්‌ ප්‍රකාශ කළ රාජිත සේනාරත්න මහතා, ලසන්ත වික්‍රමතුංග ඝාතනය සඳහා ආරක්‌ෂක අමාත්‍යංශයේ හිටපු ප්‍රබල ප්‍රධානියකු සහ එම ආණ්‌ඩුවේ සිටි ඇමැතිවරයෙකු සම්බන්ධ බවද කීවේය.
ලසන්ත ඝාතනය සම්බන්ධව හිටපු ඇමැති මර්වින් සිල්වා මහතා පසුගියදා අපරාධ පරක්ෂණ දෙපාර්තමේන්තුවට කළ පැමිණිල්ලේ ඇතුළත් කරුණු සියල්ල සත්‍ය බව කී ඇමැති රාජිත සේනාරත්න මහතා මෙම ඝාතනයට වගකිවයුත්තන් පිළිබඳ තොරතුරු රැසක්‌ ලැබී ඇතැයි ද කීය.
එමෙන්ම පාර්ලිමේන්තු මන්ත්‍රීවරුන් වන රවිරාඡ්, ජෝශප් පරරාජසිංහම් යන අයගේ ඝාතන පිළිබඳවද තොරතුරු ලැබී ඇතැයි කී ඇමැතිවරයා එම ඝාතන සිද්ධීන් පිළිබඳ විමර්ශන කටයුතු ද යළි ආරම්භ කර ඉතා ඉක්‌මණින් ඝාතකයන් නීතිය ඉදිරියට ගෙන එන බව කීවේය.
- divaina
