රටේ ආදරණීය ජනතාවගේ වගකීම තමන්ට බාර දී ඇති බවත්, එය ඉතාමත් විශිෂ්ට ලෙස ඉටුකරන බවත් අද(09) ජනපතිධූරයේ දිවුරුම්දීමෙන් අනතුරුව සඳහන් කළේය.
මෙරටට අවශ්‍ය ආර්ථික, සමාජයීය, දේශපාලනික පරිවර්තනයන් දින 100ක් ඇතුළත ස්ථිරවම ඉටුකරන බවත්, රටක දේශපාලන සංකෘතිය මීට වඩා ප්‍රබුද්ධ විය යුතු බවත්, නව ජනපති එහිදී අවධාරණය කර සිටියේය.
එසේම තමා නැවත වරක් ජනාධිපතිවරණයක් සඳහා ඉදිරිපත් නොවන බවත්, තමා පොදු අපේක්ෂකයා ලෙස තෝරාපත්කර ගැනීමට රටේ ප්‍රධාන පක්ෂයක් වන එ.ජා.ප. ඇතුළු රනිල් වික්‍රමසිංහ මහතාට ස්තූතිවන්ත වන බවත් පැවැසිය.
පොදු අපේක්ෂකවරයා ලෙස මෙම මැතිවරණ ව්‍යාපාරය කිරීමට පහසු නොවු බවත්, ඉතිහාසයේ කිසිදු මැතිවරණයකදී තමාට මෙවන් වු විශාල ගැටලු ප්‍රමාණයකට මුහුණදීමට සිදු නොවූ බවත්, නව ජනපති මෛත්‍රීපාල සිරිසේන මහතා එහිදී කියා සිටියේය.
තමාගේ ආධාරකරුවන්ට ප්‍රහාර එල්ල කිරීම, රත්නපුර ප්‍රදේශයේ සිදු වු පුද්ගල මරණය සම්බන්ධයෙන් තමා ඉතාමත් කණගාටු වන බවද කීවේය.
තවදුරටත් අදහස් දැක්වූ ජනාධිපති මෛත්‍රීපාල සිරිසේන මහතා කියා සිටියේ මෙම මැතිවරණයේ ජයග්‍රහණය නිසි ලෙස තමාට ලබාදීමට කටයුතු කළ හිටපු ජනාධිපති මහින්ද රාජපක්ෂ මහතාටද ස්තූතිවන්ත වන බවයි.
