සිද්ධිය වූ අවස්ථාවේ එම කාර්යාලයේ සිටි, නම ප්‍රකාශ කිරීමට අකමැති පුද්ගලයෙක් පැවසුවේ මධ්‍යම රාත්‍රී 12.30 ට පමණ වාහන තුනකින් පැමිණි තිස් දෙනෙකු පමණ පිරිසක් මෙම ප්‍රහාරය එල්ල කළ බවයි.
ඉන් දෙදෙනෙකු අතර ගිණි අවි තිබුණු බවත් කාර්යාලය වසා දමන බවට තමන්ට තර්ජනය කළ බවත් ඔහු කියා සිටියේය.
ප්‍රහාරය සඳහා පැමිණි වාහන සිවනේසතුරෛ චන්ද්‍රකාන්තන් හෙවත් පිල්ලෙයාන්ගේ නායකත්වයේ පවතින TMVP පක්ෂයට අයත් ඒවා බව තමන් හඳුනා ගත් බවද ඉහත කී පුද්ගලයා බීබීසීයට ප්‍රකාශ කළේය.
මෙහිදී වෙඩි කිහිපයක් තබා ඇති මුත් කිසිවෙකු තුවාල ලබා නැති බවයි වාර්තා වන්නේ. සැක පිට දෙදෙනෙකු අත්අඩංගුවට ගත් බව ප්‍රාදේශීය පොලිස් නිලධාරීන් පවසතත් එය නිල වශයෙන් තවම පොලිසිය නිවේදනය කර නැත.
මේ පිළිබඳව ප්‍රතිචාර ලබා ගැනීම සඳහා TMVP පක්ෂය සම්බන්ධ කර ගැනීමට බීබීබීය දැරූ උත්සාහය සාර්ථක නොවූ අතර ඔවුන් මේ දක්වා තම පක්ෂයට එල්ල වී ඇති චෝදනා පිළිබඳව කිසිවක් ප්‍රකාශ කර නොමැත.
