ඊයේ (27) පදනම් ආයතනයේදී පැවැති මෙම මාධ්‍ය හමුව සංවිධානය කොට තිබුනේ ප්‍රවෘත්ති දෙපාර්තමේන්තුවේ මෙහෙය වීමෙන් වන අතර මේ සදහා සහභාගීවූ මහාචාර්යවරුන් විසින් මෙවර ඉදිරිපත් කළ අය වැයෙන් විශ්වවිද්‍යාල ආචාර්යවරුන් සදහා මෙන්ම අධ්‍යාපනය සදහා මුදල් වෙන් කිරීම අතිශොක්තියෙන් වර්ණා කොට ඇත.
එසේම මෙම අය වැයෙන් 2040 වනවිට ලංකාව සංවර්ධිත රාජ්‍යයක් බවට පත් කිරීමට මූලික පියවර තබා ඇති බවද ඔවුන් මෙම අය වැය අර්ථ කථනය කොට සිටියේය.
මෙහිදී අධ්‍යාපනය සදහා 6%ක මුදල්වෙන් කිරීමක් සිදුනොකිරීම පිළිබදව මහාචාර්යවරුන්ගෙන් ප්‍රශ්න කිරීමේදී ඔවුන් සදහන් කොට ඇත්තේ එය වෙනම සාකච්ඡා කළ යුතු බවත් එය අය වැය සමග පටලවා නොගන්නා ලෙසයි.
එසේම විශ්වවිද්‍යාල සිසුන්ගේ මහපොල වාරිකය රුපියල් 4000කින් වැඩි කිරීම සම්බන්ධව ඇගයූ මහාචාර්යවරයෙකු සදහන් කොට සිටියේ නැවත මහපොල වැඩිකිරීමක් සම්බන්ධයෙන් සිසුන් හඩ නොනගනු ඇති බවයි.
මාධ්‍ය වේදීන් ඒ සම්බන්ධව විමසා සිටියේ පවතින ජීවන තත්වයට සමරූපීව සිසුන්ගේ ඉල්ලීම වූයේ රුපියල් 5000කින් ශිෂ්‍යාධාරය වැඩිකිරීම බව නොවේද යන්නට පිළිතුරු නොදී අදාළ මාධ්‍ය සාකච්ඡාව හිටි හැටියේ නවතා දමා මෙම මහාචාර්යවරුන් පිරිස නැගිට ගොස් ඇත.
කෙසේ නමුත් මාධ්‍ය සාකච්ඡාව සංවිධානය කළ ප්‍රවෘත්ති දෙපාර්තමේන්තුවේ නිලධාරීන් මාධ්‍ය වේදීන් සමග පවසා ඇත්තේ ප්‍රශ්නයකට පිළිතුරු නොදිය හැකි මහාචාර්යවරුන් අදාල පුවත්පත් සාකච්ඡාවට කැදවීම නිරර්තක ක්‍රියාවක් වූ බවයි.
මෙම මාධ්‍ය හමුව සදහා කැළණිය, කොළඹ, ජයවර්ධනපුර හා පේරාදෙනිය විශ්වවිද්‍යාල නියෝජනය කරමින් ආණ්ඩුවට පක්ෂපාත ආචාර්යවරු පිරිසක් සම්බන්ධව සිටියේය.
2015 සදහා මහින්ද රාජපක්ෂ ආණ්ඩුව විසින් ඉදිරිපත් කළ අය වැයෙන් විශ්වවිද්‍යාල පද්ධතියට හා අධ්‍යාපනය සදහා වෙන් කළ මුදල් සම්බන්ධයෙන් අදහස් දැක්වූ විශ්වවිද්‍යාල මහාචාර්යවරුන් පිරිසක් මාධ්‍ය වේදීන්ගේ ප්‍රශ්න කිරීම් හමුවේ නිරුත්තරව අදාල මාධ්‍ය සාකච්ඡාවෙන් නැගිට ගොස් ඇති බව වාර්තාවේ.
Leave a comment
