ගුරුවරුන්ගේ උසස්‌වීම් හා හිඟ වැටුප් 2008 වසරේ ජුලි පළමු වැනිදා සිට ලබාදෙන බව අධ්‍යාපන අමාත්‍යාංශය නිල වශයෙන් ප්‍රකාශ කළ නමුත් අලුත්ම ගැසට්‌ නිවේදනයට අනුව හිඟ වැටුප් හිමිවන්නේ 2011 වසරේ නොවැම්බර් මාසයේ සිටය.
එමෙන්ම ගුරුවරුන්ගේ හිඟ වැටුප් ලබාදීම සඳහා රුපියල් කෝටි හාරදහසක පමණ මුදලක්‌ අවශ්‍ය වන නමුත් මෙවර අයවැයෙන් ඒ සඳහා මුදල් වෙන්කර නැති බවද වාර්තාවේ.
ගුරුවරුන් දෙලක්‍ෂ හතළිස්‌ දහසකට පමණ නව ව්‍යවස්‌ථාවෙන් සහන සැලසෙන බව ජනාධිපතිවරයා අයවැය කතාවේදී ප්‍රකාශ කළ නමුත් අධ්‍යාපන අමාත්‍යාංශය නිකුත් කළ නිල ප්‍රකාශයට අනුව සහන සැලසෙන්නේ ගුරුවරුන් දෙලක්‍ෂ විසිහත් දහසකට පමණි.
ගුරුවරුන්ගේ හිඟ වැටුප් ලබාදීම සඳහා රුපියල් කෝටි හාරදහසක පමණ මුදලක්‌ අවශ්‍ය වන තත්ත්වයකදී මෙවර අයවැයෙන් අධ්‍යාපන අමාත්‍යාංශයේම සියලු කටයුතු සඳහා වෙන් කර ඇත්තේ රුපියල් කෝටි හාරදහස්‌ දෙසියකි. අධ්‍යාපන සේවා අමාත්‍යාංශයට රුපියල් කෝටි හත්සියයකි.
මෙම කරුණු අනාවරණය වූයේ ගුරු හා විදුහල්පති වෘත්තීය සංගම් කිහිපයක සහභාගිත්වයෙන් කොළඹ ජාතික පුස්‌තකාල හා ප්‍රලේඛන සේවා මණ්‌ඩලයේ ඊයේ (27 වැනිදා) පැවැති මාධ්‍ය හමුවේදීය.
එම සංගම් එකමුතුව වෙනුවෙන් අදහස්‌ දැක්‌වූ මහින්ද ජයසිංහ මහතා සඳහන් කළේ අයවැය කතාවෙන් ඉදිරිපත් කළ කරුණු හා අධ්‍යාපන අමාත්‍යාංශය ප්‍රකාශ කරන කරුණු අතර බරපතළ පරස්‌පරතා පවතින බවය. එහෙයින් ගුරුවරුන්ට හා විදුහල්පතිවරුන්ට සහන ලබාදීම සම්බන්ධයෙන් දැඩි සැකයක්‌ මතුව ඇතැයිද ඒ මහතා කීවේය.
ජනාධිපතිවරයා 2010 වසරේ ජනාධිපතිවරණයට ඉදිරිපත් වීමට සති තුනකට පෙර චක්‍රලේඛයක්‌ නිකුත් කරමින් ගුරු හා විදුහල්පති වැටුප් විෂමතා ඉවත් කළ බව ප්‍රකාශ කළ නමුත් කිසිදු සහනයක්‌ නොලැබුණු බවද මෙවරද ජනාධිපතිවරණය ආසන්නයේ ගුරුවරුන් හා විදුහල්පතිවරුන් රැවටීමකට ලක්‌කර ඇතැයි යන සැකය මතුවන බවත් හෙතෙම කීවේය.
(දිවයින)
මේ වනවිට නිකුත් කර ඇති නව ගුරු සේවා ව්‍යවස්‌ථාවට අනුව ගුරුවරුන් දෙලක්‍ෂ හතළිස්‌ දහසකගේ වසර තුනක හිඟ වැටුප් අහිමි කර ඇතැයි ගුරුවරු පවසති.
Leave a comment
