වසර ගණනාවක් පුරා මෙරට පැවති අක්රමවත් සංවර්ධන ක්රියාවලිය හේතුවෙන් සංචරණ මාර්ග සහ අලි මංකඩ අවහිර වීම නිසා අහිතකර පාරිසරික බලපෑම් එල්ල වී ඇති බව එම අමාත්යාංශය පවසයි.
මේ අතර වර්තමානය වනවිට වනඅලින්ට එල්ල වී ඇති තර්ජන සම්බන්ධයෙන් “අද දෙරණ” පරිසර යුක්ති කේන්ද්රයේ විධායක අධ්යක්ෂ හේමන්ත විතානගේ මහතාගෙන් විමසීමක් කළේය.
“ලංකාවේ පසුගිය කාලය තුළ අලින් 5,000ක් පමණ ඉන්නවා කියලා යෝජනා තිබුණි. නමුත් පසුගිය කාලය තුළ වනජීවි සමීක්ෂණය අනුව වනඅලි 7,000කට වඩා සිටින බව කිව්වා. ඒ ප්රමාණය පිළිබඳ අපිට ගැටලු තියෙනවා. නමුත් ලංකාවේ තියෙන ප්රධාන ප්රශ්නයක් තමා වසරකට අලි ඇතුන් 400කට අධික ප්රමාණයක් මියයනවා ඒ වගේම මිනිස් ජීවිත 200 ආසන්න ප්රමාණයක් මියයන අලි මිනිස් ගැටුමේදී. මේ දක්වා වසරේ අලි මරණ 180ක් සිදුවෙලා තියෙනවා. මිනිස් මරණ 56ක් සිදුවෙලා තියෙනවා. එයිනුත් අලි මරණ 75ක් විතර මිනිස්සු අතින් සිදුවෙලා තියෙනවා. වෙඩි තියලා 30 දෙනෙක් විතර අලි මැරිලා, 23ක් විදුලිය පාවිච්චි කිරීම හරහා සහ 19ක් හක්කපටස් හරහා. අලි මරණ දිගින් දිගටම වැඩි වෙන්නේ මේ දෙගොල්ලෝම ලංකාවේ භූමි ප්රමාණයෙන් 40%කට වැඩි ප්රමාණයක් එකට වාසය කිරීම.”
අලි මිනිස් ගැටම්වලට විසඳුමක් ලෙස තම සංවිධානය මඟින් යොමු කර ඇති විධිමත් වැඩපිළිවල ක්රියාත්මක කළයුතු බව ඔහු වැඩිදුරටත් සඳහන් කළේය.
මේ අතර, ඊයේ (11) සවස අඹන්පොල පොලිස් වසමේ නැලව ප්රදේශයේදී වනඅලියෙකු පහරදීම හේතුවෙන් පුද්ගලයෙකු මියගොස් ඇති බවට අඹන්පොල පොලිස් ස්ථානය වෙත ලද පණිවිඩයක් මත විමර්ශන ආරම්භ කර ඇත.
එලෙස මියගොස් ඇත්තේ 43 හැවිරිදි අඹන්පොල ප්රදේශයේ පදිංචිකරුවෙකි.
මියගිය පුද්ගලයා තම කුඹුර වෙත පැමිණි වනඅලි පළවා හැරීමට උත්සහා කිරීමේදී වනඅලි ප්රහාරයට ලක්ව ඇති බවට සිදුකරන ලද වැඩිදුර විමර්ශනයේදී අනාවරණය වී ඇත.
