අකුරට වැඩ කිරීමේ වෘත්තිය ක්‍රියාමාර්ගයට සමගාමීව ලෙඩ නිවාඩු වාර්තා කිරීමේ වෘත්තීය ක්‍රියාමාර්ගය විදුලි සේවකයින් ආරම්භ කරනු ලැබුවේ ඊයේ දිනයේදීයි.
කෙසේ වෙතත් සිය ඉල්ලීම්වලට රජයෙන් මෙතෙක් යහපත් ප්‍රතිචාරයක් ලැබී නොමැති බවයි වෘත්තීය සමිති ප්‍රකාශ කළේ.
අසනීප නිවාඩු වාර්තා කළ විදුලිබල මණ්ඩල සේවකයින් පිරිසක් ඊයේ දහවල් ලංකා විදුලි බල මණ්ඩල ප්‍රධාන කාර්යාල ඉදිරිපිටට පැමිණ විරෝධතාවක නිරත වුණා.
මේ අතර, මේ වසරේ සිදු කිරීමට නියමිත 03 වන විදුලි ගාස්තු සංශෝධනය වන සියයට 6.8ක ගාස්තු වැඩිවීම සම්බන්ධයෙන් මහජන අදහස් විමසීම අද සිට ආරම්භ වන බව මහජන උපයෝගීතා කොමිසම පවසනවා.
ඒ අනුව, නැගෙනහිර පළාතෙන් මෙම කටයුත්ත ආරම්භ කරන බවයි එම කොමිසම සඳහන් කළේ.
දිස්ත්‍රික් ලේකම් කාර්යාලවලදී මහජන අදහස් විමසීම සිදුකරන අතර එය සියලු පළාත් ආවරණය වන පරිදි පැවැත්වීමට කටයුතු යොදා තිබෙනවා.
එමෙන්ම යෝජිත විදුලි ගාස්තු සංශෝධනය සම්බන්ධයෙන් මහජනතාවගේ ලිඛිත අදහස් හා යෝජනා ලබන මස 7 වැනිදා දක්වා භාරගැනීමට නියමිත බවයි මහජන උපයෝගීතා කොමිසම කියා සිටියේ.
