වායු දූෂණය නිසා ඇතිවන රෝග තත්ත්වයන් හේතුවෙන් වසරකට ලෝකයේ පුද්ගලයන් මිලියන හතක් මියයන බවද ඇය පැවැසුවාය.

ජාත්‍යන්තර නීල වර්ණ අහස්තල දිනය සැමරීමේ ජාතික උත්සවයට සමගාමීව ජාතික වායු තත්ත්ව වෙබ් අඩවිය ජනගත කිරීම සඳහා මධ්‍යම පරිසර අධිකාරියේ ඊයේ (08 වැනිදා) පැවැති උත්සවයේදී ඇය මේ බව කියා සිටියාය.

වායු දූෂණය නමැති අවදානම් සාධකය නිසා පෙණහලු පිළිකාවලින් සියයට 29 ක්, අංශ භාගය නිසා සියයට 24 ක්, හෘදයාබාධවලින් සියයට 25 ක්, දීර්ඝ කාලීන පෙණහලු ලෙස රෝගවලින් සියයට 43 ක් වැනි ප්‍රතිශතයක් මියයන්නේ වායු දූෂණයේ බලපෑම මත බවද ඇය පැවැසුවාය.

දූෂිත වායු නිසා ඇතිවන කෙටිකාලීන සෞඛ්‍ය ගැටලු රැසක් ඇතිවන බවත්, අඩු බර සහිත දරුවන් ඉපදීමට සේම දියවැඩියා රෝග තත්ත්වයට ප්‍රධාන සාධකයක් බවට වායු දූෂණය පත්ව ඇති බවත් ඇය කියා සිටියාය.

ඩිමෙන්ෂියා හෙවත් අමතකවීමේ රෝගයට සේම වායු දූෂණය බලපාන බවත්, දරුවන් ඔටිසම් තත්ත්වයට පත්වීමට පවා වායු දූෂණය බලපාන බව පර්‌යේෂණවලින් සොයාගෙන ඇතිබවත් විශේෂඥ වෛද්‍යවරිය සඳහන් කළාය.

නියුමෝනියාව වැනි තත්ත්වයන් ඇති කිරීමට වායු දූෂණය බලපාන බවත්, වායු දූෂණය යනු නිහඬ බරපතළ මාරකයක් බවත් ඇය පැවැසුවාය.