මෙම කතාව සම්බන්ධයෙන් විපක්ෂය නියෝජනය කරන පාර්ශවවලින් පමණක් නොව, ආණ්ඩු පක්ෂයට සහාය දක්වන පාර්ශ්ව වල ද අසතුට පළ වී ඇති බවට ආරංචි මාර්ග සඳහන් කරයි.
හිටපු ජනාධිපති මහින්ද රාජපක්ෂ මහතාගේ නිල නිවස සම්බන්ධයෙන් ජනාධිපතිවරයා සිදුකළ ප්‍රකාශය ශ්‍රී ලංකා පොදුජන පෙරමුණ පාර්ශවයේ දැඩි විවේචනයට ලක් වී තිබේ. විශේෂයෙන්ම, යුද්ධය අවසන් කළ නායකයෙකුගේ නිල නිවසින් ඔහු එළියට දැමීමට සූදානම් වීම ගැන ඔවුන් දැඩි අදහස් පළ කර තිබේ. එම ප්‍රකාශය සමස්තයෙන්ම ආණ්ඩු පක්ෂයට සහාය දැක්වූ පිරිස් අතර අසන්තෝෂය මතු කිරීමට හේතුවී ඇත.
එමෙන්ම, ආණ්ඩු පක්ෂයට හිතවත් කණ්ඩායම් පවසන්නේ, ජනාධිපතිවරයාගේ මෙම කතාව නිවැරදි සන්නිවේදන කාර්යයකින් තොරව සිදු වු අතර, පොදුජන පෙරමුණට අලුත් ආවේගයක් ලබාදීමට හේතු වූ බවයි.
ජනාධිපතිවරයාගේ කතාවේදී විවිධ ආයතන, ආරක්ෂක අංශ සහ පෞද්ගලික ක්ෂේත්‍ර සම්බන්ධයෙන් කළ ප්‍රකාශ ද අදාළ අංශවල අසතුටට හේතුවී ඇති බව ආරංචි මාර්ග හෙළි කරයි.
ජනාධිපතිවරයා ප්‍රසිද්ධ වේදිකාවක සිට ජනතාව අමතද්දී, රටේ ආර්ථිකය සංවර්ධනය කිරීමට සම්බන්ධිත කරුණු පිළිබඳ සාකච්ඡා කිරීමට ජනතාව බලාපොරොත්තු වී සිටියත්, ඔහුගේ කතාව විවේචන සහ අභ්‍යන්තර මත ගැටුම් වලට වැඩි අවධානය යොමුකළ බවයි විපක්ෂය සහ මධ්‍යස්ථ පාර්ශව චෝදනා කරන ආකාරය.
කෙසේ වෙතත්, මාලිමා පාක්ෂිකයින් කොටසක් ජනාධිපතිවරයාගේ මෙම කතාවෙන් මහත් සතුටට පත්වූ අතර, ඔවුන්ගේ මතය අනුව, මෙම කතාව විපක්ෂ බලවේග පුරා දැඩි බලපෑමක් සිදුකළ බව සමාජ මාධ්‍ය තුළ දැක්විණි.
