ස්ථාන මාරු තීරණය කර ඇත්තේ දෙපාර්තමේන්තුවේ අවශ්‍යතා සම්බන්ධයෙන් කිසිදු අවධානයකින් තොරව වීම මත තත්ත්වය තවත් බරපතළ වී තිබේ. මින් පෙර කිසිම වසරක මෙවැනි ප්‍රමාණයකට එකවර ස්ථාන මාරු ලබා දී නොමැත. ස්ථාන මාරු ලබන පිරිස අතර දෙමළ නිලධාරීහු කිහිප දෙනෙක් ද වෙති. වෙනත් වසරවල ස්ථාන මාරු කෙරෙන දෙමළ නිලධාරීන් සංඛ්‍යාවට සමාන දෙමළ නිලධාරීන් සංඛ්‍යාවක් දෙපාර්තමේන්තුවට පත් කෙරෙන නමුත් මෙවර එවැනි ක්‍රියාමාර්ගයක් ද ගෙන නැත. සිංහල හා දෙමළ මාධ්‍ය දෙකෙන් ම විභාග පැවැත්වෙන හෙයින් දෙමළ නිලධාරීන් දෙපාර්තමේන්තුවට අත්‍යවශ්‍ය බව ඉහත ආරංචි මාර්ග සඳහන් කළේය.
ස්ථාන මාරු ලැබීමට නම් කර සිටින ඇතැම් නිලධාරීන් දෙපාර්තමේන්තුවේ අවශ්‍යතාව මත කර තිබෙන අභියාචනා ද මේ දක්වා කිසිදු සැලකිල්ලකට භාජනය කර නොමැත. විභාග කටයුතු සඳහා අත්‍යවශ්‍ය නිලධාරීන් ස්ථාන මාරු නොකරන ලෙසට විභාග කොමසාරිස් ජනරාල් අමිත් ජයසුන්දර අමාත්‍යාංශයෙන් කළ ඉල්ලීමට ප්‍රතිචාර දක්වා ඇත්තේ එම නිලධාරීන් ඇතුළු සියලු නිලධාරීන්ගේ ස්ථාන මාරු මාර්තු මස 31 වැනිදා දක්වා අත්හිටුවීම පමණි.
විභාග කටයුතුවලට ඉදිරියේ ඇති විය හැකි අහිතකර බලපෑම වගකිව යුත්තන්ගේ අවධානයට යොමු නොවුවහොත් බරපතළ තත්ත්වයන්ට මුහුණ දීමට සිදු වීම නොවැළැක්විය හැකි බව ද ඉහත ආරංචි මාර්ග පැවැසීය.
