එකම පාසලේ දස වසරක සේවා කාලයක් සහිත ගුරුවරුන්ගේ ස්ථාන මාරු ලේඛන අනුව මේ වන විට පාසල් ප්‍රධානීන්ට දැනුම් දීම් කර තිබෙන නමුත් ඇතැම් ගුරුවරුන් තවදුරටත් එම පාසල්වලම රැඳී සිටීමට උත්සාහ දරන බවට තොරතුරු ලැබී තිබෙන බව ලේකම්වරයා සඳහන් කළේය. මෙවැනි ස්ථාන මාරු අත්හිටුවීමට පසුගිය ආණ්ඩුවල දේශපාලකයන් බලපෑම් කළ බවත් මෙවරත් එවැනි අවස්ථා වාර්තා වෙමින් තිබෙන බවත් හෙතෙම පවසයි.
දස වසරක සේවා කාලයක් සහිත ගුරුවරු හාරදහස් පන්සියයත් පන් දහසත් අතර පිරිසක් ස්ථාන මාරු කිරීමට සුදුසු බවට ගුරු මාරු මණ්ඩලය නිර්දේශ කර තිබෙන නමුත් අනුප්‍රාප්තිකයන් නොමැති වීම මත මෙම ස්ථාන මාරු ක්‍රියාත්මක කිරීම සම්බන්ධයෙන් අමාත්‍යාංශය ද ගැටලුවකට මුහුණ දී ඇත. මීට පිළියමක් වශයෙන් ලේකම්වරයා පවසන්නේ දුෂ්කර සේවයේ යෙදී නොමැති වයස අවුරුදු හතළිස් පහත් පනහත් අතර සියලු ගුරුවරු ස්ථාන මාරු කළ යුතු බව ය.
