වාහනයේ වටිනාකම මත විශේෂ ආනයන බද්ද, සුඛෝපභෝගී බද්ද (wealth tax) හා සියයට 18ක වැට් බද්ද (vat) වාහනයේ මිලට ඉදිරියේදී එකතුවීම මීට හේතුව බව ආනයනකරුවන්ගේ සංගමය පවසයි.

මේ අනුව, පවතින වාහන මිලට වඩා සුළු වශයෙන් වාහන මිල ඉහළ යෑමක් බලාපොරොත්තු විය හැකි බව ශ්‍රී ලංකා වාහන ආනයනකරුවන්ගේ සංගමයේ සභාපති ප්‍රසාද් මානගේ මේ පිළිබඳව පැවැසීය.

නිෂ්පාදිත දිනයේ සිට අවුරුදු 10ට නොවැඩි වාහන සඳහා එන්ජින් ධාරිතාව අනුව සියයට 200ත් 300ත් ප්‍රමාණයක බදු ප්‍රතිශත මුදල් අමාත්‍යවරයා වන ජනාධිපතිවරයා ගැසට් නිවේදනයක් මගින් පනවා ඇත.

පෙබරවාරි මාසයේ සිට ආනයනය කරනු ලබන වාහන සඳහා එන්ජින් ධාරිතාව මත අයකරන බදු එම ගැසට් නිවේදනය මගින් පෙන්වා දී තිබේ.

එන්ජින් ධාරිතාව 660 CC වාහන සඳහා පැවැති බද්ද ලක්ෂ 16ක් පමණ වන අතර නව බදු ප්‍රතිශතවලට අනුව එය ලක්ෂ 18ක් පමණ වන බව ත් එන්ජින් ධාරිතාව 1000 CC වාහන සඳහා පැවති බද්ද ලක්ෂ 20ක් පමණ වන අතර එය ලක්ෂ 24ක් පමණ වන බව ත් වාහන ආනයනකරුවන් පවසයි.

මේ අතර, එන්ජින් ධාරිතාව 1500 CC වාහන සඳහා ලක්ෂ 55ක් ලෙස පැවති බදු ලක්ෂ 66ක් පමණ වනු ඇති බවත් ආනයනකරුවන් සඳහන් කළේ ය.

වාහන කාණ්ඩවල එන්ජින් සිලින්ඩර ධාරිතාව සහ කිලෝවොට්වලින් මනිනු ලබන මෝටර් බලය මත පදනම්ව බදුවලට යටත් කර ඇත.

කෙසේ වෙතත්, වාහන ගෙන්වීමට හැකි අවුරුදු සීමා තීරණය කර නැති බැවින් වාහන මිල ගණන් නිශ්චිත ලෙස දැන්ම කීමට නොහැකි බව ලංකා වාහන ආනයනකරුවන්ගේ සංගමයේ සභාපති ඉන්දික සම්පත් මෙරෙන්චිගේ ‘මව්බිම’ කළ විමසීමකදී කීවේය.

එසේ ම, සියලු ම ආකාරයේ බදු එකතු කිරීමට පසුව අවසන් මිලක් ගණනය කිරීමට හැකිවනු ඇති බව ඔහු පැවසීය.