ශ්‍රී ලංකා රේගුවට වංචා සහ දූෂණ සම්බන්ධයෙන් චෝදනා එල්ල වන නමුදු දූෂිත රේගුව නොව ඇතැම් නිලධාරීන් යැයි සඳහන් කරන ඒ මහතා 2024 වසරේ වංචා සහ දූෂණවලට සම්බන්ධ බවට සැකපිට රේගු නිලධාරීන් සය දෙනකු වැඩ තහනමට ලක් කර ඇතැයි ද තවත් පිරිසක් සේවයෙන් පහකර ඇති අතර තවත් පිරිසකට දඬුවම් පමුණුවා ඇතැයි ද ප්‍රකාශ කරයි. අල්ලස් හෝ දූෂණ විමර්ශන කොමිෂන් සභාව මගින් පනවා තිබූ නඩුවකින් වරදකරුවන් බවට පත් රේගු නිලධාරීන් සිව්දෙනකුට පසුගිය දිනවල වසර 35 ක සිරදඬුවම් නියම කර තිබේ.
වංචා දූෂණ සම්බන්ධයෙන් මේ වන විට ගෙන ඇති ක්‍රියාමාර්ග හේතුවෙන් එම තත්ත්වය අවම වී ඇති අතර ජාත්‍යන්තර මූල්‍ය අරමුදලේ එක් යෝජනාවක් අනුව රේගු දෙපාර්තමේන්තුව තුළ අභ්‍යන්තර කටයුතු අංශයක් ආරම්භ කර තිබේ. ඒ අනුව දූෂිත නිලධාරීන් සම්බන්ධයෙන් එම නිලධාරියාගේ නම සහ තනතුර සමඟ පැමිණිලි කිරීමට මහජනතාවට අවස්ථාව සැලසේ. ලැබෙන සෑම පැමිණිල්ලක් සම්බන්ධයෙන්ම විමර්ශනයක් සිදුකොට එම පුද්ගලයන්ට දඬුවම් කරන බවද රේගු මාධ්‍ය ප්‍රකාශකවරයා සඳහන් කරයි.
- දේශය
