දකුණු පළාතෙන් මත්ස්‍යයන් ගෙනැවිත් මෙම ප්‍රදේශයේ කරවල සඳහා වේලන බවද මේ සඳහා අනවසර මෙවලම් භාවිතා කරන බවද චෝදනා එල්ල වී තිබේ.
මහින්ද ජයසිංහ හා සුගත් තිලකරත්න යන නියෝජ්‍ය ඇමතිවරුන් මීගමුව වෙරළ තීරය හා මීගමුව කොටුව ආශ්‍රිත කරවල වේලන ස්ථාන පසුගිය 31 වැනිදා නිරීක්ෂණයට ගිය අවස්ථාවේදී මේ බව අනාවරණය වී ඇත.
කරවල නිෂ්පාදනය කරන මුහුදු තීරය දැනට වසර ගණනාවකට පෙර මහජනතාව ගිමන් හරිමින් වීවේක සුවය විඳි ප්‍රදේශයක් වන අතර දැන් මෙම භූමි ප්‍රදේශය මාළු වේලා කරවල නිෂ්පාදනය කරන ස්ථානයක් බවට පත්ව ඇති බව මෙහිදී සඳහන් විය.එහෙත් දැනට විශාල පිරිසකගේ ජීවනෝපාය බවට මෙම කර්මාන්තය පත්ව තිබෙන බවත් ඒ සඳහා මෙම භූමිය වඩාත් උචිත බවත් සාකච්ඡාවට සහභාගි වූ කරවල සමිති සාමාජිකයන් හා නියෝජිතයෝ පැවසූහ.
මීගමුව මහ නගර සභාවේ ප්‍රධාන මහජන සෞඛ්‍ය පරීක්ෂක එච්. ඒ. යූ.කේ. ගුණරත්න මෙහිදී කියා සිටියේ මෙය පියවරෙන් පියවර විසඳිය යුතු කාර්යයක් බවය.
