නොවැම්බර් මාසය සඳහා වන බාහිර අංශයේ කාර්ය සාධන වාර්තාවට අනුව, 2023 වසරේ මුල් මාස 11 තුළ වැය කර තිබු ඩොලර් බිලියන 1.83 ට සාපේක්ෂව 2024 පළමු මාස 11 තුළ මුළු සේවා අංශයෙන් පිටතට ගලායාම ඩොලර් බිලියන 2.9 ක් ලෙස ඇස්තමේන්තු කර ඇත.

එයින් වැඩිම වියදමක් දරා ඇත්තේ විදේශ සංචාර සහ ප්‍රවාහන සේවා අංශ සඳහාය. විදේශ සංචාර සඳහා ඩොලර් වියදම් පසුගිය වසරට වඩා 378.9% කින් එනම් ඩොලර් මිලියන 674.7 දක්වා වැඩි වී තිබිණි. මුහුදු භාණ්ඩ ප්‍රවාහනය ඩොලර් මිලියන 359.8 දක්වා 64.9% කින් ඉහළ ගොස් ඇති අතර ගුවන් භාණ්ඩ ප්‍රවාහනය ඩොලර් මිලියන 145.3 දක්වා 102.9% කින් ඉහළ ගොස් ඇත.

මේ අතර, සංචාරක ව්‍යාපාරයෙන් ඉපැයීම් හැර, සේවා අංශයට මුළු ගලා ඒම පසුගිය වසරේ එම කාලය තුළ ඩොලර් බිලියන 3 ට සාපේක්ෂව 2024 නොවැම්බර් අවසානය වන විට ඩොලර් බිලියන 3.37 ක් ලෙස ඇස්තමේන්තු කර ඇත.

එබැවින්, සමස්ත බාහිර අංශයේ ගලා ඒම් සහ පිටතට ගලායාම සලකා බැලීමේදී, ශ්‍රී ලංකාව 2023 වසරේ එම කාලය සඳහා ඩොලර් මිලියන 1,908 ට සාපේක්ෂව ජනවාරි සහ නොවැම්බර් අතර ඩොලර් මිලියන 2,912.5 ක ශුද්ධ ගලා ඒමක් වාර්තා කර ඇත.

තවද, නොවැම්බර් මාසය අවසන් වන විට ශ්‍රී ලාංකිකයන් 283,618 දෙනෙකු විදේශ රැකියා සඳහා පිටත්ව ගොස් ඇති බවත් එය පසුගිය වසරේ සංඛ්‍යාලේඛනවලට වඩා 3.3% ක වැඩිවීමක් බවත් මහ බැංකුව පවසයි.