පොලිසිය සන්නද්ධ කල්ලියක් නොවන බවත් වෘත්තියක් වශයෙන්ද ජනතාවට සේවා සපයන ආයතනයක් බව සිහියේ තබාගත යුතු අතර ගණිකා සේවය වෘත්තීය අපරාධයක් නොවන බවත් එම වෘත්තියේ යෙදෙන කතුන්ට දඬුවම් කළ නොහැකි බවත් ගණිකා නිවාසයක් කරගෙන යන කළමනාකාරීත්වයට එරෙහිව නීතිමය පියවර ගැනීමේ හැකියාව පවතින බවත් පැවසීය.
මානව හිමිකම් කොමිසමේ කොමසාරිස්වරයා මේ බව පැවසුව් අන්තර් ජාතික මානව හිමිකම් දිනය සමරමින් මාතලේ මහ ලේකම් කාර්යාලයේ වීර මොනරවිල කැප්පෙටිපොළ ශාලාවේදී පැවැති සැමරුම් උත්සවයේදීය.
තවද ශ්‍රී ලංකාවේ මේ වනවිට කොවිඩ් සමයේ සිට විභාග වෙමින් පවතින පැමිණිලි 8000ක් පමණ පවතින බව නීතිඥ නිමල් ජී. පුංචිහේවා වැඩිදුරටත් පැවසුවේය.
දිනකට මානව හිමිකම් කඩවීම් හැටකට ආසන්න සංඛ්‍යාවක් ලැබෙන බවත් අධ්‍යාපනය, පොලිසිය සහ සෞඛ්‍ය අංශවලට එරෙහිව ලැබෙන පැමිණිලි ඉහළ ගොස් ඇති බවත් පුංචිහේවා මහතා පැවැසීය.
මෙම අවස්ථාවට මානව හිමිකම් කොමිෂන් සභාවේ සභාපති විශ්‍රාමික ශ්‍රේෂ්ඨාධිකරණ විනිසුරු එල්.ටී.බී. දෙහිදෙණිය, මහාචාර්ය ප්‍රතිභා මහානාම, මාතලේ අතිරේක දිස්ත්‍රික් ලේකම් උල්පත ජයරත්න, ශ්‍රී ලංකා මානව හිමිකම් කොමිෂන් සභාවේ මධ්‍යම පළාත් ප්‍රධානි පී. රංජිත්, ඩයස් සුමනසේකර යන මහත්වරුද සහභාගි වූහ.
