පාර්ලිමේන්තුව අද (17) පෙරවරු 9.30 ට නියෝජ්‍ය කථානායක වෛද්‍ය රිස්වි සාලි මහතගේ ප්‍රධානත්වයෙන් රැස්වීමට නියමිත අතර එහිදී ප්‍රධාන කටයුත්තක් ලෙස කථානායකවරයකු පත් කර ගැනීම සිදුවේ. පාර්ලිමේන්තුව අද රැස්වීමෙන් පසුව සමගි ජන බලවේගයේ ජාතික ලැයිස්තුවෙන් නම් කරන ලද මන්ත්‍රීවරුන් දිව්රුම් දීමෙන් පසුව කථානායකවරයා පත්කර ගැනීම සිදුවේ.

නව කථානායක ධුරය සඳහා එක් මහජන නියෝජිතයකුගේ නමක් පමණක් යෝජනා වුවහොත් එම මහජන නියෝජිතයා කථානායක ධුරය සඳහා පත්වන අතර යම් හෙයකින් නම් දෙකක් යෝජනා වුවහොත් රහස් ඡන්ද විමසීමක් සිදුවේ.

කථානායක ධුරය සඳහා නියෝජ්‍ය කථානායක රිස්වි සාලි, වෛද්‍ය ජගත් වික්‍රමරත්න, ලක්ෂ්මන් නිපුණආරච්චි මහතා සහ නිහාල් ගලප්පත්ති යන මහජන නියෝජිතයින් කිහිපදෙනකුගේ නම් යෝජනා වී ඇති බව ද වාර්තා වේ.

කථානායකවරයා ලෙස කටයුතු කළ අසෝක රන්වල මහතා සිය ඉල්ලා අස්වීම ජනාධිපති අනුර කුමාර දිසානායක මහතා වෙත යොමුකරමින් පසුගිය 13 වනදා ඉල්ලා අස්විය. අසෝක රන්වල මහතා සිය ධුරයෙන් ඉල්ලා අස්වීම ජනාධිපතිවරයා පිළිගෙන ඇති බව ජනාධිපති ලේකම්වරයා විසින් පාර්ලිමේන්තුවේ මහලේකම් කුෂාණි රෝහණදීර මහත්මිය වෙත ලිඛිතව දැනුම් දී තිබිණ.

ආණ්ඩුක්‍රම ව්‍යවස්ථාවේ 64(2) ව්‍යවස්ථාව අනුව කථානායක, නියෝජ්‍ය කථානායක හෝ නියෝජ්‍ය කාරක සභා සභාපති යන කවර පදවියකින් හෝ ඉල්ලා අස්වන්නේ නම් ඒ බව ස්වකීය අත්සන යටතේ වූ ලිපියක් මඟින් ජනාධිපතිවරයාට දැනුම්දිය යුතු වේ. ඒ අනුව ජනාධිපති ලේකම්වරයා විසින් පාර්ලිමේන්තුවේ මහලේකම්වරියට මෙම ලිඛිත දැනුම්දීම සිදු කර ඇත.

එමෙන්ම සමගි ජන බලවේගය විසින්ද කථානායක ධුරය සඳහා නමක් යෝජනා කිරීමට නියමිත බව ද වාර්තා වේ.