රජය විසින් ආනයනය කරන සහල් තොග මෙරටට ලැබෙන්නේ කවදාදැයි තමාට මේ මොහොතේ පැවැසීමට නොහැකි බව කෘෂිකර්ම හා පශු සම්පත් නියෝජ්‍ය ඇමැති නාමල් කරුණාරත්න පැවැසීය.
කෘෂිකර්ම අමාත්‍යාංශයේ ඊයේ (16 වැනිදා) පැවැති මාධ්‍ය හමුවකදී ඔහු මේ බව කියා සිටියේය.
පෞද්ගලික අංශය ආනයනය කරන සහල් තොග යම් ප්‍රමාණයක් මේ වෙද්දී රට තුළට ලැබී තිබුණ ද, රජය මැදිහත්ව ආනයනය කරන සහල් තොග මෙරටට ලැබෙන්නේ කවදාදැයි මාධ්‍යවේදියකු විමසූ පැනයකට පිළිතුරු දෙමින් නියෝජ්‍ය ඇමැතිවරයා මේ බව කියා සිටියේය.
“මම හිතන්නේ ඕක වෙළෙඳ අමාත්‍යංශයෙන් අහන්න ඕන එකක්. මට මේ වෙලාවේ ඒකට උත්තරයක් දෙන්න අපහසුයි.“
මාධ්‍යවේදියා - හැබැයි ඔබ කෘෂිකර්ම විෂය භාර නියෝජ්‍ය ඇමැතිවරයා. ඔබට ඒ ප්‍රශ්නයෙන් පැනලා යන්න බෑ. මොකද ඔබ තොරතුරු දැනගත යුතුයි. මේ වෙද්දී රටට අවශ්‍ය සහල් ප්‍රමාණය රට තුළ නෑ. සහල් පාලන මිල නියම කර ගැසට් පත්‍රයක් නිකුත් කළත් ඒ මිලට සහල් ගන්න තැනක් නෑ.
නියෝජ්‍ය ඇමැතිවරයා - මේ සහල් ප්‍රශ්නයට අවසානයේදී ජනාධිපතිතුමා ටිකක් තදට මැදිහත් වුණා. දැන් සහල් වෙළෙදපොළට එනවා. රට සහල් යම් ප්‍රමාණයක් රටට ඇවිත් තියෙනවා. කලින් තිබුණ සංකීර්ණ තත්ත්වය නෑ.
