ගුවන්තොටුපොළත්, ශ්‍රීලංකන් ගුවන් සමාගමත් නියෝජනය වන පරිදි ගුවන්තොටුපොළ පරිශ්‍රය තුළ මේ විශේෂ ඒකකය පිහිටුවා පැය 24 පුරාම ගුවන් යානා ප්‍රමාදය පිළිබඳ තොරතුරු ක්ෂණිකව මගීන් දැනුම්වත් කරන්නටත්, ප්‍රමාද කාල සීමාවේ මගීන්ට උපරිම පහසුකම් දෙන්නට අවශ්‍ය පියවර ගන්නා ලෙසත් ඇමැතිවරයා උපදෙස් දී ඇත්තේ ශ්‍රී ලංකන් ගුවන් යානා ප්‍රමාදය සම්බන්ධයෙන් වූ පැමිණිලි සොයා බැලීමට පෙරේදා (10) කටුනායක ගුවන්තොටුපොළ පරිශ්‍රයේ කළ නිරීක්ෂණ චාරිකාව අතරතුරය.

පසුගිය පාලන සමයේ ගත් තීරණයක් මත 2023 වසරේ ප්‍රසාද දීමනා වශයෙන් සේවකයන්ට දුන් රු. 50,000ක මුදල නැවත අය කළොත් මේ වසරේදී ප්‍රසාද දීමනාව අහිමිව යෑමට හේතු විය හැකි බව මෙහිදී සේවකයෝ පෙන්වා දුන්හ. එලෙස සේවකයන්ට දුන් ප්‍රසාද දීමනාව නැවත අය කිරීම සදාචාර විරෝධී ක්‍රියාවක් බැවින් එම තීරණය ක්‍රියාත්මක නොකරන්නැයි ඇමැතිවරයා ගුවන්තොටුපොළ හා ගුවන්සේවා සභාපතිවරයාට උපදෙස් දුන්නේය.

ඉකුත් ජනවාරි මස ගුවන්තොටුපොළ ආරක්ෂක අංශයට බඳවා ගත් 150කට ආසන්න කණ්ඩායමට මෙතෙක් දී ඇත්තේ එක් නිල ඇඳුමක් පමණක් බව ද මෙහිදී හෙළි විය. මේ ආරක්ෂක අංශ කණ්ඩායමේ නිල ඇඳුමේ පමණක් වර්ණ හා‍ අමුද්‍රව්‍ය වෙනස්ව ඇති හෙයින් සියලු ආරක්ෂක නිලධාරීන්ගේ ඇඳුම් සමාන වර්ණ හා අමුද්‍රව්‍යයෙන් සැකසීමට උපදෙස් දුන් ඇමැතිවරයා එතෙක් පාවිචිය සඳහා එක් අයකුට නිල ඇඳුම් තුනක්වත් දෙන ලෙසත් බලධාරීන්ට උපදෙස් දුන්නේය.

ගුවන්තොටුපොළ හා ගුවන්සේවා සභාපති හර්ෂ ඩී. අබේවික්‍රම සහ උප සභාපති සිරිල් වන්නිගම මහත්වරුන් ඇතුළු ඉහළ කළමනාකාරීත්වයේ පිරිස් මේ අවස්ථාවට එක් වූහ.