තඹුත්තේගම විශේෂිත ආර්ථික මධ්‍යස්ථානයේ උඩරට එළවළු මිල සාමාන්‍ය තත්ත්වයක පැවතියත් පහතරට එළවළු මිල ගණන් ඊයේ ඉහළ ගොස් තිබිණි.
ඒ අනුව, වම්බටු කිලෝවක තොග මිල රුපියල් 280 ත් 300 ත් අතර මිලක් දක්වාද, මෑ කරල් කිලෝවක තොග මිල රුපියල් 250 ත් 300 ත් අතර මිලක් දක්වාද, පතෝල කිලෝවක තොග මිල රුපියල් 150 ත් 200 ත් අතර මිලක් දක්වාද ඉහළ ගොස් තිබිණි.
වට්ටක්කා කිලෝවක තොග මිලද රුපියල් 120 ක් දක්වා වැඩිවී තිබිණි. එමෙන්ම, අමු මිරිස් කිලෝවක්ද අලෙවි කෙරුණේ රුපියල් 280 ත් 350 ත් අතර තොග මිලකටය.
කෙසේ නමුත්, උඩරට එළවළු වර්ග අතරින් ඉහළ මිලක පැවතියේ බෝංචි සහ මාළු මිරිස් සඳහා පමණි. බෝංචි කිලෝවක තොග මිල රුපියල් 330 ත් 350 ත් අතර මිලක් දක්වාද, මාළු මිරිස් කිලෝවක තොග මිල රුපියල් 480 ත් 500 ත් අතර තොග මිලක් දක්වාද ඉහළ ගොස් තිබිණි.
උඩරට එළවළු අතරින් කැරට් සහ ගෝවා කිලෝවක තොග මිල රුපියල් 50 ක් දක්වා පහත වැටී තිබිණි. එහෙත් සිල්ලර වෙළෙඳපොළේ කැරට් කිලෝවක් රුපියල් 160 කට අලෙවි කෙරේ.
-p.m
