මෙම වකවානුව තුළ සමස්ත බදු ආදායම රු. බිලියන 2,348 ක් ලෙසින් සටහන්ව ඇති අතර එයින් රු. බිලියන 624 ක් ආදායම් බදු ලෙසත්, රු. බිලියන 1,421 ක් භාණ්ඩ හා සේවා මත අය කරනු ලැබූ බදු ලෙසත් දක්වා ඇත.

මෙහි ඇති විශේෂත්වය නම් භාණ්ඩ හා සේවා මත අයකෙරෙන බදු තුළ අන්තර්ගත ප්‍රධාන සංරචකයක් වූ VAT බදු ආදායම රු. බිලියන 842ක් දක්වා 87.2%කින් වැඩි වී තිබීමයි. මීට අමතරව සුරාබදු ආදායම මෙම වකවානුව තුළ දී රු. බිලියන 385 ක් දක්වා 42% කින් ද මෙම මාස 08ක කාලපරිච්ඡේදය තුළ දී ඉහළ ගොස් තිබේ.

බදු නොවන ආදායම රු. බිලියන 209 ක් දක්වා 31.7% කින් ඉහළ ගොස් තිබීම ද විශේෂත්වයකි.

කෙසේ නමුත් පැවැති රනිල් වික්‍රමසිංහ ආභ්ඩුව විසින් පවත්වාගෙන ගිය බදු ප්‍රතිපත්තියට එරෙහිව වැඩිම හඩක් නැංවූ ජාතික ජන බලවේගය තමන්ගේ පාලනයක් තුළ බදු ලිහිල් කරන් බවත් අධ්‍යාපන සෞඛ්‍ය හා ආහාර මත පනවා ඇති වැට් බදු ඉවත් කරන බවටත් සහතික කර කියා සිටිය නමුත් මේ වන තෙක් එවැනි පියවරක් ගෙන නොමැත.

මේ අතර අද දින ආනයනික ආහාර ද්‍රව්‍ය කිහිපයකට විශේෂ වෙළඳභාණ්ඩ බද්ධක් පැනවීමට ජනාධිපති අනුර කුමාර තීරණය කර තිබිණි. ඒ අනුව සම්පූර්ණ සහ පියලි කළ මයිසූර් පරිප්පු කිලෝග්‍රෑමයක් සඳහා සත 25ක බද්දක්ද, සම්පුර්ණ සහ පියලි කළ කහ පරිප්පු කිලෝග්‍රෑමයට සත 25ක බද්දක්ද පනවා තිබේ.

උම්බලකඩ සහ ඊට ආදේශක භාණ්ඩ සඳහා කිලෝග්‍රෑමයට රුපියල් 302ක විශේෂ වෙළෙඳ භාණ්ඩ බද්දක් ද එමගින් පනවා ඇත.

තවද කටු ගැලවූ මසුන් සහ අනෙකුත් මසුන්ගේ මස් හැර, අලුත් හෝ ශීතකළ මසුන් සඳහා 10%ක් හෝ කිලෝග්‍රෑමයට රු.400 යන දෙකෙන් ඉහළ අගයක් වන බදු ප්‍රමාණයක් ද පනවා තිබේ.

Pre-Election Budgetary Position Report 2024 ප්‍රකාශයට අනුව 2024 වසරේ පළමු මාස 08 තුළ දී දේශීය හා විදේශීය ණය සඳහා පොලී වශයෙන් රු. බිලියන 1,559.7ක් ගෙවා ඇති බව මුදල් අමාත්‍යාංශය පවසයි.

2023 වසරේ මුල් මාස 08 තුළ එම ප්‍රමාණය වාර්තා වී තිබුණේ රු. බිලියන 1,525.7 ක් ලෙසිනි.

මෙහි ඇති විශේෂත්වය නම් පසුගිය 2023 වසරේ මෙම කාලපරිච්ඡේදයට සාපේක්ෂව මෙම වසරේ මුල් මාස 08 තුළ විදේශ ණය සඳහා පොලී ගෙවීම් 34.9% කින් ඉහළ ගොස් තිබීමයි. 2023 වසරේ මුල් මාස 08හි රු. බිලියන 74.1 ක්වූ විදෙස් ණය පොලී ගෙවීම් මේ වසරේ මුල් මාස 08 තුළ රු. බිලියන 100 ක් දකවා ඒ අනුව වැඩි වී ඇත. මේ සම්බන්ධයෙන් මුදල් අමාත්‍යාංශය වැඩිදුරටත් පවසන්නේ අත්හිටුවා තිබූ ඇතැම් බහුපාර්ශවයීය ණය පොලී ගෙවීම් නැවත ආරම්භ කිරීමත් සමඟ මෙලෙස මෙම වසරේ දී ණය පොලී ගෙවීම් ඉහළ ගොස් ඇති බවයි.

තවද දේශීය ණය පොලී ගෙවීම් රු. බිලියන 1,451.6 සිට රු. බිලියන 1,459.7 ක් දක්වා 0.6% ක වැඩි වීමක් වසරේ මුල් මාස 08 තුළ පෙන්නුම් කර ඇත.

මේ අතර 2024 වසරේ සමස්ත ණය පොලී ගෙවීම් ප්‍රමාණය රු. බිලියන 2,650 ක් බවට මුදල් අමාත්‍යාංශය විසින් ඇස්තමේන්තු කර තිබේ.