"ලෝකයේ අඩුම රාජ්‍ය ආදායම තිබිලත් දැන් යම් තැනකට ඇවිල්ලා රට කරගෙන යනවා. විපක්ෂය දැන් කියන්න උත්සාහ කරනවා මේ අයකර ගන්න තියෙන දේවල් අයකර ගන්නේ නැතුව අලුත් දේවල් කරන්න හදනවා අපි හිටියා නම් ඔහොම නෑ කියන්නනේ ඔය උත්සාහය. ඕක සරල තර්කයක්.
රජය හැටියට පැහැදිලිවම කියන්න ඕනේ ඔව් හිඟ බදු ප්‍රමාණයක් තියෙනවා. පළවෙනි එක අපේ රටේ බදු නීතියේ තියෙන අභියාචන අයිතිය. ඒක ලෝකයේම තියෙනවා. රජය විසින් බද්දක් ගෙවන්න කිව්වහම, නීතිය ඉදිරියේ ගිහින් අභියාචනා කරනවා, රජය කිව්වට අපිට මේක ගෙවන්න බෑ කියලා. අධිකරණයෙන් අධිකරණයට යන්න සමස්ත ජනතාවට අයිතියක් තියෙනවා. ඒ තුළ තියෙන ඒවා තමා මෙතැන වැඩිපුර තියෙන්නේ. දෙවැනි එක රජයේ ආයතන ගෙවන්න තියෙන බදු. මම කියන්න ඕනේ හිඟ බදු අයකර ගැනීමට රජයට තියෙන සියලු බලතල මේ යුගයේ තරම් ක්‍රියාත්මක කරපු යුගයක් තවත් නෑ."
මේ අතර රුපියල් බිලියන 1,000 ඉක්මවූ හිඟ බදු මුදලක් අයකර ගැනීම සඳහා ගත යුතු පියවර කවරේද යන්න පිළිබඳ සාරාංශ වාර්තාවක් පාර්ලිමේන්තුවට ඉදිරිපත් කිරීමට කටයුතු කළ බව මුදල් රාජ්‍ය ඇමැති ආචාර්ය රංජිත් සියඹලාපිටිය මහතා පසුගිය ජුනි 10 වනදා ප්‍රකාශ කර තිබිණි.
වගකිවයුතු නිලධාරීන් ආදායම් එකතු කිරීම පැහැර හැර ඇති බවට වන චෝදනා ඉදිරිපත් වුවද මේ වන විටත් මෙම වසරේ ඉලක්ක ගත ආදායම ඉක්මවා යාමට දේශීය ආදායම් දෙපාර්තමේන්තුව, රේගුව ආදී ආයතන කටයුතු කර ඇති බව ද ඒ මහතා මාධ්‍යයට අදහස් දක්වමින් කීවේය.
යම් යම් නිලධාරීන් සහ පුද්ගලයන් අතින් එවැනි වැරදි සිදුවන බව සත්‍යයක් වුවද සමස්තයක් ලෙස නිලධාරීන් තම වගකීම ඉටුකර ඇති බව පෙන්වාදෙන ඇමතිවරයා, කෙසේ වෙතත් මෙතරම් හිඟ බදු ප්‍රමාණයක් ඇතිවීමට සාධාරණ හේතු ඇති බව සඳහන් කළේය.
එහිදී බදු අභියාචනා ක්‍රියාවලිය මෙන්ම රජය විසින් රාජ්‍ය ආයතනවලට ගෙවිය යුතු බදු ප්‍රමාණය ද මේ සඳහා බලපාන බව සඳහන් කරන සියඹලාපිටිය මහතා, ඒ අනුව මෙම හිඟ බදු නැවත අයකර ගැනීම සඳහා පවතින අධිකරණ ක්‍රමවේදය ඉක්මන් කිරීමට ගත හැකි පියවර හා රාජ්‍ය ආයතනවලින් අයවිය යුතු බදු ප්‍රමාණය අයකර ගැනීමට හෝ ඒවා ඉවත් කිරීමට ගත හැකි පියවර කවරේ ද යන්න පිළිබඳ වාර්තාවක් ද තමන් පාර්ලිමේන්තුවට ඉදිරිපත් කළ බව ද ප්‍රකාශ කළේය.
සමහර හිඟ බදු වසර 25 ක පමණ සිට පැවත එන හිඟයන් බව පවසන ඒ මහතා එම ගැටලුවලට පිළිතුරු සොයන විද්‍යාත්මක ක්‍රමය පිළිබඳ සාරාංශ සටහන පාර්ලිමේන්තුවට ඉදිරිපත් කළද, ඒ පිළිබඳ විස්තරාත්මක සටහනක් ඉදිරි පාර්ලිමේන්තු අවස්ථාවක පාර්ලිමේන්තුවට ඉදිරිපත් කිරීමට සකස්කර ඇතැයි ද සඳහන් කළේය.
පසුගිය අප්‍රේල් 01 වෙනිදා ශ්‍රී ලංකා රේගුව, දේශීය ආදයම් දෙපාර්තමේන්තුව සහ සුරාබදු දෙපාර්තමේන්තුව මගින් රජයට රු.බි. 1066 ක් (රු. කෝටි ලක්ෂයක්) එකතු කළ යුතු හිඟ බදු පවතින බව ක්‍රම සහ විධි කාරක සභාවේ දෙවැනි වාර්තාව පාර්ලිමේන්තුවේදී සභාගත කරමින් එහි සභාපති පාඨලී චම්පික රණවක කියා සිටියේය.
මේ වසරේ ජනවාරී පළමු වැනිදා වැට් බදු වැඩි කිරීම සිදු කළේ රු.බි. 600 ක් රජයට එකතු කර ගැනීමේ අරමුණෙන් බවත්, පසුගිය අවුරුදු පහ තුළ ඉහත ආයතන විසින් එකතු කර නොගත් බදු ආදායම් ප්‍රමාණය රු. බි. 656 ක් බව ද ඔහු පැවසීය.
කෝටි 100 ට වැඩි බදු පැහැර හැර ඇති ප්‍රමාණය 92ක් බවත්, කෝටි 50-100 අතර 104 දෙනෙකු සිටින බවත්, මිලියන 300-400 අතර 57 දෙනෙකු සිටින බවත්, මිලියන 50-100 අතර 630 දෙනෙකු සිටින බවත් මිලියන 10 - 50 අතර 3108 දෙනෙකු සිටින බව ද සභාපතිවරයා හෙළි කළේය.
