එම නිසා ගංගාවල ඉහළ ප්‍රදේශවලට අධික වැසි තත්වයක් ඇතිවුවහොත් මෙම ගංගා ආශ්‍රිතව ගංවතුර තත්වයක් උද්ගතවීමේ අවදානමක් පවතින බව වාරිමාර්ග අංශ සඳහන්කරයි.
කාලගුණික අංශ විසින් කැලණි,කළු,ගිං යන ගංගාවල ඉහළ ප්‍රදේශවලට අධික වැසි තත්වයක් ඇතිවන බවට සඳහන් කර ඇතැයිද වාරිමාර්ග දෙපාර්තමේන්තුව කියයි.මෙම ගංගා ආශ්‍රිතව දිය නෑම,ඔරු පැදීම අනතුරුදායක බවද වාරිමාර්ග දෙපාර්තමේන්තුව අනතුරු අඟවයි.
කෙසේ වෙතත් කලු ගගේ අතු ගංගාවක් වන කුඩා ගග ආශ්‍රිතව පිහිටා තිබෙන කුකුළේ ගග විදුලි බලාගාර ජලාශයේ තවදුරටත් විවෘත කර ඇති අතර,මේ හේතුවෙන් බුලත්සිංහල ප්‍රාදේශීය ලේකම් කොට්ඨාසයේ පහත් බිම් සහ ඒ ආශ්‍රිත අතුරු මාර්ග රැසක් දැනටමත් ජලයෙන් යටවී තිබේ.
අත්තනගලු ඔය ආශ්‍රිතව සුළු ගංවතුර තත්වයක් උද්ගතව ඇත.මේ හේතුවෙන් අත්තනගලු ඔය දෙපස පිහිටා තිබෙන අත්තනගල්ල,ජා ඇල,ගම්පහ යන ප්‍රාදේශීය ලේකම් කොට්ඨාස ආශ්‍රිත පහත් බිම් ජලයෙන් යටවී තිබේ.
බස්නාහිර,සබරගමුව,වයඹ,දකුණු පළාතේ ගාල්ල සහ මාතර දිස්ත්‍රික්ක ආශ්‍රිතව ගලා යන සියළු ගංගාවල ජල මට්ටම ඉහළ මට්ටමක පවතින බව වාරිමාර්ග අධ්‍යක්ෂක (ජල විද්‍යා සහ ආපදා කළමනාකරණ) එස්.පී.සී.සුගීෂ්වර පැවැසීය.
දිවයිනේ ජලාශ වල සමස්ත ජල ධාරිතාවය සියයට 78 ක් දක්වා ඉහළ ගොස් තිබේ.ජලාශ වල වාන් දැමීමේ සීඝ්‍රතාවය ක්ෂණිකව ඉහළ දැමීමට සිදුවන බැවින් ඒ සම්බන්ධව ජලාශ පහල පදිංචි ජනතාව දැඩි අවධානයෙන් පසුවීම වැදගත් බවද ඔහු පැවසීය.
