අදාළ නිවේදනයේ දැක්වෙන්නේ මිනිස් ජාවාරම්කරුවන් පිරිසක් එක්ව රුසියාවේ හමුදා සේවය සඳහා ශ්‍රී ලාංකික තරුණයින් යොමු කරවීමේ ජාවාරමක් මේ වන විට ක්‍රියාත්මක බවය.
රුසියානු හමුදාවේ ඉහළ වැටුප් සහිත රැකියා ලබාදෙන බව පවසා විශ්‍රාමික හමුදා සාමාජිකයින් මේ සඳහා බඳවා ගෙන ඇති අතර, ඔවුන් වැන්ගර් කුලි හමුදාවේ සේවය සඳහා යොදවාගෙන ඇති බව සඳහන්ය.
එහිදි ඉදිරි ආරක්ෂක වළල්ලේ රාජකාරි සඳහා ඔවුන් යොදවා ඇති බව ද මාස ගණනකින් ඔවුන්ට හිමි වැටුප් පවා ලබා දී නොමැති බව ද අදාළ නිවේදනයේ සඳහන්ය.
ශ්‍රී ලංකා විදේශ සේවා නියුක්ති කාර්යාංශය හා ශ්‍රී ලංකා රජයේ අනුමැතියකින් තොරව කිසිදු පුද්ගලයෙකු යුද සේවය සඳහා විදෙස් රටකට යොමුනොකරන බව මනූෂ නානායක්කාර අමාත්‍යවරයා පවසයි.
එබැවින් කිසිදු අවස්ථාවක සංචාරක වීසා මඟින් රැකියා සඳහා විදේශ ගත නොවන ලෙස ශ්‍රී ලංකා විදේශ සේවා නියුක්ති කාර්යාංශය ජනතාවගෙන් වැඩිදුරටත් ඉල්ලීමක් සිදුකරයි.
මේ අතර රුසියාවේ සහ යුක්‍රේනයේ කුලී හමුදා කඳවුරුවලට මෙරට හිටපු හමුදා සාමාජිකයින් යොමුකිරීමේ ජාවාරමකට අදාළව විශ්‍රාමික හමුදා නිලධාරින් දෙදෙනෙකු කුරුණෑගල ප්‍රදේශයේ දී අත්අඩංගුවට ගෙන තිබේ.
අපරාධ පරීක්ෂණ දෙපාර්තමේන්තුව මඟින් ඔවුන් අත්අඩංගුවට ගෙන ඇති බව පොලීසිය පැවසුවේය.
හිටපු යුද හමුදා මේජර් ජෙනරාල්වරයෙකු සහ හිටපු යුද හමුදාවේ සැරයන්වරයෙකු මෙලෙස අත්අඩංගුවට ගෙන තිබේ.
මේ අතර අදාළ ජාවාරම් සම්බන්ධයෙන් සිදුකෙරෙන විමර්ශන තවදුරටත් තිව්‍ර කරන බව පොලිස් මාධ්‍ය ප්‍රකාශක නියෝජ්‍ය පොලිස්පති නීතීඥ නිහාල් තල්දූව පැවසුවේය.
-P.M
