විශේෂයෙන්ම VAT බදු වැඩිවීම සහ අයහපත් කාලගුණික තත්ත්වයන් හේතුවෙන් සැපයුම් අංශයට සිදුවූ බලපෑම මත මෙලෙස උද්ධමනයේ ඉහළ යාමක් සිදුවිය හැකි බව මහ බැංකු අධිපතිවරයා වැඩිදුරටත් සඳහන් කරයි.
අද (23) පෙරවරුවේ දී ශ්‍රී ලංකා මහ බැංකු මූලස්ථාන පරිශ්‍රයේ පැවති මාධ්‍ය හමුවක දී අධිපතිවරයා මේ බව පැවසීය.
කෙසේවෙතත් කෙටිකාලීනව බලපෑ ඇති කාලගුණික තත්ත්වයන් මේ වන විට ස්ථාවර වෙමින් පවතින බවත්, එය තාවකාලික වැඩිවීමක් පමණක් බවත් අධිපතිවරයා මෙහිදී පෙන්වා දුන්නේය.
ඒ අනුව ඉදිරියේ දී මහ බැංකුවේ අපේක්ෂිත උද්ධමන ඉලක්කය වන 5% මට්ටමේ, එනම් 4% - 6% පරාසය තුළ සාමාන්‍ය වශයෙන් තබා ගැනීමට හැකිවනු ඇති බව විශ්වාස කරන බව මහ බැංකු අධිපති ආචාර්ය නන්දලාල් වීරසිංහ මහතා මෙහිදී අවධාරණය කළේය.
කොළඹ පාරිභෝගික මිල දර්ශකය අනුව 2023 දෙසැම්බර් මාසයේ උද්ධමනය 4.0% ක් ලෙසින් සටහන් වන අතර ජාතික පාරිභෝගික ම්ල දර්ශකයට අනුව 2023 දෙසැම්බර් මාසයේ උද්ධමනය 4.2% ක් ලෙසින් වාර්තා වේ.
