ආසියානු ජාතිකයෙකු මෙම ලෝක ශූරතාවය හිමිකරගත් පළමු අවස්ථාව මෙය වෙයි.
ශ්‍රී ලංකාවට ගෞරවයක් හිමිකර දෙමින් දිවයිනට පැමිණි ධනංජය හෙට්ටි ආරච්චි මහතාව ටෝස්ට් මාස්ටර් සමාජ සංගම්හි නිලධාරීන් සහ ඔහුගේ පවුලේ සාමාජිකයින් විසින් ගුවන්තොටුපොළ ප්‍රභූ පර්යන්තයේදී ඉතා උනුසුම් අන්දමින් පිළිගනු ලැබීය.
ටෝස්ට් මාස්ටර් ඉන්ටර්නැෂනල් විසින් වසරක් පාසා පවත්වන මෙම ලෝක ශූරතා තරගාවලියට ලොව පුරා රටවල් 126 ක 14500 ට අධික ටෝස්ට් මාස්ටර් සමාජ සංගම්වලින් කථීකයෝ 30000 ට අධික පිරිසක් සහභාගී වූහ.
සිව් දිනක් පුරා පැවති තරගාවලියේ පසුගිය අගෝස්තු 21 පැවති අවසන් පුර්ව තරගාවලියේදී ලොව හොඳම කථීකයින් 9 දෙනා තුන්දහසකට අධික නරඹන්නන් ඉදිරියේ තම කුසලතා දැක්වුහ
ඉංග්‍රීසි භාෂාවෙන් පමණක් පැවැත්වෙන තරගාවලියේ ‘අයි සී සම්තින්‘ යන මාතෘකාව යටතේ විනාඩි 7 ක කතාවක් පැවැත්වු ධනංජය ප්‍රේක්ෂකාගාරයේ සිටි සියළු දෙනා තම ග්‍රහණයට නතු කර ගත්තේය.
විටෙක හාස්‍ය මතුකළ ඔහුගේ කතාවේ ගැබ්ව තිබු පණ්විඩය සියළු දෙනාගේ අවධානය යොමු වීම මත ඔහු මෙම ජයග්‍රහණය හිමිකරගත්තේය.
මේ වන විට මානව සම්පත් කළමනාකරුවෙකු ලෙස සේවය කරන ධනංජය ගල්කිස්ස ශාන්ත තෝමස් විදුහලේ ආදි සිසුවෙකි.
ධනංජය ඔහු ලැබු ජයග්‍රහණය පිළිබඳ මෙසේ පැවසුවේය
‘‘අවුරුදු 75 ක තරගාවලි ඉතිහාසයේ ආසියානු ජාතිකයෙක් ලෝක ශූරතාව හිිමිකරගත් පළමු අවස්ථාව මේක. ඉතින් මේ ජයග්‍රහණය සමස්ථ ශ්‍රී ලංකාවේ ජයග්‍රහණයක් පමණක් නෙමෙයි සමස්ථ ආසියාවේම ජයග්‍රහණයක්. ඒ නිසා මේ මොහොත ලංකාවට ආඩම්බර වෙන්න පුලූවන් අවස්ථාවක්.
ලෝකයේ සියළු රටවල් වලින් දක්ෂ කථීකයෝ මෙහි තරග කළා. මිනිත්තු හතක කතාවක් මට කරන්න තිබුනේ. එහිදී මගේ කතාවේ තේමාව උනේ මගේ පියා මා අධ්‍යාපනය අවසන් කර ගෙදර සිටින විට ඔහුගේ යහළුවෙක් වෙත අරන් ගියා. ඒ යහළුවා එදා මා දිහා බලා කිව්වා ‘‘අයි සී සම්තින්‘‘ කියලා. ඒ කියන්නේ ඔහුට මගේ මොනවා හරි පෙනුනා. ඒත් ඒක එකපාරටම කියන්න බැහැ ටික දවසක් යනවා කිව්වා. ඒ එදා පෙනුන දේට ඔහු මාව යොමු කළා. එහි ප්‍රථීපලය තමයි මා අද මේ ලබා ගත් ජයග්‍රහණය. මගේ කතාවේ තේමාව එයයි.
ඒ වගේම ඉංග්‍රීසි භාෂාව මව් භාෂාව නොවු රටක කෙනෙකු මේ ජයග්‍රහණය හිමිකරගත්තා කිව්වම එතන හිටිය හැමෝම පුදුම උනා.
මම වසර 10 යක් තිස්සේ විවිධ තරගවලට සහභාගී වෙමින් මේ සඳහා පුහුණුව ලබා ගත්තා. පැරදුනු හැම වෙලාවෙම මම එයින් යම් පාඩමක් ඉගෙන ගත්තා. මම අපේ දරුවන්ට කියන්නේ ඕනෙම කෙනෙකුට උත්සාහය සහ උනන්දුව තියෙනවා නම් ලෝක ජයගන්න එක සුළු දෙයක්.‘‘
(ලංකාදීප)
