ආණ්ඩුක්‍රම ව්‍යවස්ථාවට අනුව ජනාධිපතිවරයාට මේ වන විට ඕනෑම අවස්ථාවක පාර්ලිමේන්තුව විසිරුවා හැරිමට බලය ඇත.

උදාහරණයක් ලෙස, 2023 දෙසැම්බර් 18, 2024 ජනවාරි 2, පෙබරවාරි 2 හෝ මාර්තු 2 යන දිනවලින් එකක දී පාර්ලිමේන්තුව විසිරුවා හැරීම ප්‍රකාශයට පත් කරන්නේ නම්, නාම යෝජනා බාර ගැනීමේ දිනය සහ මැතිවරණ පැවැත්වීය හැකි ආසන්නතම දිනය හා දුරස්ථම දිනයන් වගුවේ දැක්වේ.

1. 2023 අය වැයට පසුව (දෙසැම්බර් 18) පාර්ලිමේන්තුව විසිරුවා හැරෙන්නේ නම්, පෙබරවාරි දෙවන සතියේ ද,

2. 2024 ජනවාරි 2 දිනට පාර්ලිමේන්තුව විසිරුවා හැරෙන්නේ නම්, පෙබරවාරි අවසන් සතිය හෝ මාර්තු පළමු සතියේ ද,

3. 202 පෙබරවාරි 2 දිනට පාර්ලිමේන්තුව විසිරුවා හැරෙන්නේ නම්, අප්‍රේල් පළමු සතියේ ද,

4. 2024 මාර්තු 2 දිනට පාර්ලිමේන්තුව විසිරුවා හැරෙන්නේ නම්, අප්‍රේල් අවසන් සතියේ හෝ මැයි පළමු සතියේ ද, මහා මැතිවරණය පැවැත්වීමට මැතිවරණ කොමිසම සිදු වනු ඇත.

ඉහත කාලයෙන් පසුව පාර්ලිමේන්තුව විසිරුවා හැරීමක් බලාපොරොත්තු විය නොහැක්කේ 2024 ජූලි මස ජනාධිපතිවරණය සඳහා නාම යෝජනා කැඳවීමට නියමිත බැවිනි.

මහා මැතිවරණ දිනය පිළිබඳ දළ අදහසක් ලබා ගැනීම සඳහා ඉහත ගණනය කිරීම උපයෝගී කර ගත හැකිය.

ඉදිරි සති කිහිපය තුල දේශපාලන පක්ෂ කිහිපයක්ම මහා මැතිවරණයකට හෝ ජනාධිපතිවරණයකට හෝ තමන් තරඟ කරන පෙරමුණු/සන්ධාන ප්‍රකාශය පත් කිරීමට නියමිතව ඇත. ඉතිහාසයේ පළමු වතාවට පාර්ලිමේන්තුවේ ආසන 35 සිට 60 දක්වා ප්‍රමාණයක් ලබා ගන්නා පෙරමුණු හතරක් හෝ පහක් ද, ආසන 8 -12 ලබාගත හැකි පක්ෂ දෙකක් ද, ආසන 1 සිට 4 දක්වා ලබා ගත හැකි කණ්ඩායම් හතරක් පමණ ද ඊලඟ මහා මැතිවරණයකට අපේක්ෂකයින් ඉදිරිපත් කරනු ඇත. සන්ධානයකින් තොරව කිසිදු කණ්ඩායමකට මීලඟ පාර්ලිමේන්තුවේ අගමැති සහ කැබිනට් මණ්ඩලය පිහිටුවා ගැනීමට ඇති හැකියාව අවම ය.

ව්‍යවස්ථා සභාවේ එකඟතාවයක් ලබා ගත නොහැකිව ඇති බැවින්, මැතිවරණ කොමිෂන් සභාවේ පස්වන සාමාජිකයා පවමත් පත් කර ගැනීමට ද හැකිවී නැත.

- රජිත් කීර්ති තෙන්නකෝන්