ඒ මහතා පවසා සිටියේ ප්‍රඥාවන්ත සදාචාර මාර්ගයක් වන බුදු දහමට, අප රටේ බෞද්ධ සංස්කෘතියට මෙන්ම මූර්ති කලාව ඇතුළු සමස්ත කලා විෂයන් සඳහාම සිදු කළ බරපතල නිගරුවක් බවයි.
”අවුකන බුද්ධ ප්‍රතිමාව ආගමික කලාත්මක වගේම මානව විද්‍යාත්මක වශයෙනුත් අපේ අතීත සමාජමය තොරතුරු රාශියක් හමුවේ ලෝකය හමුවේ කියාපාන කැඩපතක්.ඒ හින්දා ඒක බෞද්ධ සංස්කෘතිය වගේම අපේ රටේ අතීත සමාජමය තොරතුරු ලෝකයා හමුවේ හෙළිකරන සන්නිවේදන කවුළුවක්.
ඉතින් අන්ධ භක්තිය හරි ජාවාරම්කාර චින්තනය මුල් කරගෙන හරි මේ වගේ ශ්‍රේෂ්ඨ නිර්මාණයක් උඩට ඉනිමං තියලා නැඟලා ඒ නිර්මාණයේ ප්‍රකෘති ලක්ෂණ වසා දැමීම නීතිමය වශයෙනුත් බරපතල වරදක්.ඒ හින්දා මේ වන විට සුවිසල් අවධානයකට යොමු වෙලා තියන මේ ක්‍රියාවට සම්බන්ධ සියලු පාර්ශවයන්ට නීතිමය දඬුවම් දිය යුතුයි. නැතිනම් මේ වගේ උත්තුංග නිර්මාණ වල අගය පහළ බසින අතරේ මෙවැනි හරසුන් නිසරු ක්‍රියා අනාගතයේ තවදුරටත් ප්‍රවර්ධනය වෙන්න පුළුවන්” ආචාර්ය ලක්දුසිංහ මහතා වැඩිදුරටත් කියයි.
