එම කෞතුක භාණ්ඩ සහිත බහාලුම් නෙදර්ලන්තය වෙනුවෙන් ශ්‍රී ලංකාවේ නෙදර්ලන්ත තානාපතිනිය බොනී හෝබාච් (Bonnie Horbach) මහත්මිය විසින් බුද්ධශාසන හා සංස්කෘතික කටයුතු ඇමැති විදුර වික්‍රමනායක වෙත කටුනායක බණ්ඩාරනායක ජාත්‍යන්තර ගුවන්තොටුපොළේ දී භාර දෙනු ලැබුවේය.
ජනාධිපති රනිල් වික්‍රමසිංහ මෙම පුරාවස්තු මෙරටට ගෙන ඒම සදහා නෙදර්ලන්ත රජය සමග විශේෂ මැදිහත් වීමක් සිදු කළ අතර ඒ වෙනුවෙන් ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක හා ජනාධිපති කාර්ය මණ්ඩල ප්‍රධානි සාගල රත්නායක විසින් සම්බන්ධීකරණ කටයුතු සිදු කළේය.
කෞතුක භාණ්ඩ කොළඹ ජාතික කෞතුකාගාර දෙපාර්තමේන්තුවේ ආරක්ෂාව සහිතව තැන්පත් කර ඇති අතර දෙසැම්බර් මස 05 වැනි දින පෙරවරු 9.30 සිට කොළඹ ජාතික කෞතුකාගාරයේ විශේෂ ප්‍රදර්ශනයක් මඟින් මහජනතාව වෙත ප්‍රදර්ශනය කිරීමට සැලසුම් කර තිබේ.
වර්ෂ 1756 ලන්දේසීන් විසින් මහනුවර රාජ මාලිගාව වටලන ලද අවස්ථාවේ ශ්‍රී ලංකාව සතුව පැවැති, පසුව ලන්දේසි පෙරදිග ඉන්දීය වෙළෙඳ සමාගම (VOC) විසින් රැගෙන ගිය ඵෙතිහාසික වටිනාකමක් සහිත කෞතුක භාණ්ඩ එකතුවක් මීට ඇතුළත්ය.
මෙම කෞතුක භාණ්ඩ පිළිබඳ තොරතුරු ඇතුළත් ලිපිගොනුව ශ්‍රී ලංකාවේ නෙදර්ලන්ත තානාපතිතුමිය විසින් අමාත්‍ය විදුර වික්‍රමනායක වෙත භාර දුන් අතර පසුව එය ඇමැතිවරයා විසින් ජාතික කෞතුකාගාර දෙපාර්තමේන්තු අධ්‍යක්ෂවරිය වෙත භාර දීම සිදු කෙරිණි.
