ජා-ඇළ පොලිස් ස්ථානයේ සිර මැදිරියේ රඳවා සිටි සැකකරුවකු අධිකරණයට ඉදිරිපත් කිරීමට රැගෙන යෑමට සූදානම් වීමේදී මෙම සිද්ධිය සිදුව තිබේ.
මෙම සැකකරු අධිකරණයට රැගෙන යෑමට පොලිස් කැබ් රියට නංවා ගැනීමට සිරමැදිරියේ සිට නිලධාරීන් පිරිසක් රැගෙන එමින් සිට ඇත.
එම අවස්ථාවේදී අත් මාංචු ද සමඟ සැකකරු පොලිස් ස්ථානය ආසන්නයේ පිහිටි ජා-ඇළට පැන පලා යෑමට සූදානම් වූ අවස්ථාවේ පොලිස් නිලධාරීන් පිරිසක් ද සැකකරු අල්ලා ගැනීමට ඇළට පැන ඇත.
එලෙස ඇළට පැන තිබූ ජා-ඇළ පොලිස් ස්ථානයට අනුයුක්තව සේවයේ යෙදී සිටි පොලිස් කොස්තාපල් ක්‍රිෂ්ණමුර්ති පිරදාපන් (99033) වයස අවුරුදු 26 නිලධාරියා දිය පහරට හසුව අතුරුදන් වී ඇත.
අවිවාහකයකු වූ පොලිස් නිලධාරියා පරණ තැපැල් කන්තෝරුව පාර, පළමු පටුමඟ චාවකච්චේරි පදිංචි අයකු වේ. පලා යෑමට සූදානම් වූ හෙරොයින් සම්බන්ධ සැකකරු අනිත් නිලධාරීන් විසින් පොලිස් භාරයට ගෙන තිබේ.
මෙලෙස පොලිස් භාරයට ගෙන තිබුණේ අංක 217, ශ්‍රී බෝධිරාජාරාම පාර පදිංචි එච්. අංජු ලක්ෂාන් නමැති අයකු බව පොලිසිය පවසයි.
සිද්ධිය සම්බන්ධයෙන් උසස් පොලිස් නිලධාරීන්ගේ උපදෙස් මත ජා-ඇළ පොලිස් ස්ථානාධිපති චමින්ද එදිරිසූරිය ඇතුළු පොලිස් කණ්ඩායම් කිහිපයක් පරීක්ෂණ කටයුතු සිදු කරයි.
-P.M
