ගුරු සංගම් ද පැවසුවේ ඇතැම් ගොඩනැගිලි අවදානම් තත්ත්වයකට පත් වී දැනට සැලකිය යුතු කාලයක් ද ගතව ඇති බවයි.
කලාප අධ්‍යාපන අධ්‍යක්ෂවරුන් මගින් ඒ සම්බන්ධයෙන් පාසල් මට්ටමින් සොයා බලන බව අමාත්‍යංශය පවසන අතර, ඒ අනුව අබලන් තත්වයේ පවතින එවැනි ගොඩනැගිලි සම්බන්ධයෙන් කඩිනම් ක්‍රියාමාර්ග ගෙන සිසුන්ගේ ආරක්ෂාව තහවුරු කරන පාසල් පරිසරයක් සෑම පාසලකට ඇතිකළ යුතු බවද දැනුම් දී තිබේ.
මේ අතර හෝමාගම ජනාධිපති විද්‍යාලයේද ප්‍රාථමික පංති (03, 04,05) පවත්වාගෙන යනු ලැබූ තෙමහල් ගොඩනැගිල්ලද ඉතා අබලන් තත්වයේ පසුවන අතර, එය ඉදිකර ඇත්තේ මීට වසර 26 කට පමණ පෙර බවද තොරතුරු වාර්තා වේ. පසුගිය දා මෙම ගොඩනැගිල්ලේ වහලයෙන් කොටසක් අසල නිවසක් මතට කඩා වැටී ඇති බවද වාර්තා වේ.තාවකාලිකව දරුවන් එම ගොඩනැගිල්ලෙන් ඉවත් කර මේ වනවිට ප්‍රතිසංස්කරණ කටයුතු අරඹා තිබුණද එහි ප්‍රමිතිය පිළිබඳ විශාල ගැටලු පවතින බවයි වාර්තාවේ.
දරුවන්ගේ අධ්‍යාපනය මෙන්ම පාසල් දරුවන්ගේ ආරක්ෂාව සම්බන්ධයෙන් ද රජය දැඩි අවධානයකින් හා වගකීමකින් කටයුතු කළ යුතු බවයි ලංකා ගුරු සේවා සංගමය පැවසුවේ. එහි ලේකම් මහින්ද ජයසිංහ පවසා සිටියේ පාසල් නඩත්තු කටයුතු සඳහා අවශ්‍ය ප්‍රතිපාදන වෙන් නොවීම හේතුවෙන් පාසැල් රැසක ගොඩනැගිලි සහ ස්ථාන මේ වනවිටත් අනතුරුදායක මට්ටමේ පවතින බවයි.
පාසල් තුළ පවතින අඩු පහසුකම් හේතුවෙන් දරුවන් පාසැල් තුලදී අනතුරුවලට ලක්වීමේ තත්ත්වයන් වැළැක්වීමට රජය වගබලා ගත යුතු බවත් රජයේ මැදිහත්වීම අඩු වීම හේතුවෙන් වර්තමානයේ බොහෝ පාසල්වල නඩත්තු කටයුතු මව්පියන් පිට පැටවී ඇති බවත් ලංකා ගුරු සේවා සංගමයේ ලේකම් මහින්ද ජයසිංහ වැඩිදුරටත් පැවසුවේය.
මේ පිළිබද අධ්‍යාපන අමාත්‍ය සුසිල් ප්‍රේමජයන්ත පැවසුවේ අවදානම් තත්ත්වයේ ඇති ගොඩනැගිලි සහිත පාසැල් 74 ක් පිළිබඳ දැනටමත් දැඩි අවදානයක් යොමු කර ඇති බවත් ඒවායේ පිළිසකර කිරීම් හැකි උපරිමයෙන් ආරම්භ කර ඇති බවත්ය.
