දිවයිනට පැමිණීමෙන් අනතුරුව දේවගැතිවරයා පැය 48 තුළ අපරාධ පරීක්ෂණ දෙපාර්තමේන්තුවේ ඩිජිටල් වෝහාරික අංශයේ පෙනීසිට ප්‍රකාශයක් ලබාදිය යුතු බවත් අධිකරණ නියෝගයේ සඳහන් ය.
පසුගිය මැයි(16) දා බුදුන් වහන්සේට සහ තවත් ආගමික විශ්වාසයන් නිගරු වන අන්දමින් අදාළ දේවගැතිවරයා සිදුකළ ප්‍රකාශයක් පසුගියදා සමාජයේ දැඩි කතාබහට ලක්වුණා.
එම ප්‍රකාශය සම්බන්ධයෙන් විවිධ පාර්ශව ඔහුට එරෙහිව නීති අංශ වෙත පැමිණිල්ලක් ද සිදුකළා.
මේ අනුව සර්ව පාක්ෂික අරගලකරුවන් සංවිධානය, භික්ෂු පෙරමුණ සහ පිවිතුරු හෙළ උරුමය ආදී පාර්ශවයන් දේවගැතිවරයාට එරෙහිව පැමිණිලි ගොනු කරමින් දේවගැතිවරයාගේ ප්‍රකාශයට සිය විරෝධය පළ කළා.
මේ අතර දේවගැතිවරයා සිදුකරන ලද ප්‍රකාශය සම්බන්ධයෙන් වහාම පරීක්ෂණයක් පවත්වන ලෙස ජනාධිපතිවරයාද නියෝග කර ඇති පසුබිමක ඔහු සහ ඔහුගේ බිරිඳ සහ දියණියන් දෙදෙනා ද මැයි මස (16) සිංගප්පුරුව බලා ගොස් තිබුණා.
මේ අතර, ජෙරම් ප්‍රනාන්දු දේවගැතිවරයා රටින් පිටවීම වළක්වාලමින් අපරාධ පරීක්ෂණ දෙපාර්තමේන්තුව විසින් එදිනම කොටුව මහේස්ත්‍රාත් අධිකරණයෙන් වාරණ නියෝගයක් ලබාගෙන තිබුණා.
ඒ ඔහු සම්බන්ධයෙන් සිදුකෙරෙන විමර්ශන පිළිබඳව කොටුව මහෙස්ත්‍රාත් තිළිණ ගමගේ ඉදිරියේ කරුණු දැක්වීමෙන් පසුවයි.
මේ අතර රටෙන් පිටවීමේ වාරණ නියෝගය ලබාගන්නා විටත් රටෙන් පිටවී සිටින දේවගැති ජෙරම් ප්‍රනාන්දු නැවත දිවයිනට පැමිණෙන විටදී අත්ඩංගුවට ගැනීමට හැකියාව තිබෙනව බව පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරී නිහාල් තල්දුව පවසා තිබුණා .
-P.M
