මෙම සහනය සලසනු ලබන්නේ රජය විසින් පොහොර මිල දී ගැනීමට ලබා දෙන රුපියල් 15,000ක සහන මුදලට හා වන්දි වශයෙන් හෙක්ටෙයාර් එකකට රුපියල් ලක්ෂයක් බැගින් ලබා දෙන වන්දි මුදලට අමතරවය.
කෘෂිකර්ම හා වැවිලි කර්මාන්ත අමාත්‍ය මහින්ද අමරවීරගේ ප්‍රධානත්වයෙන් ඊයේ (06) වගා හානි සිදුවූ ගොවින්ට ලබා දිය යුතු සහන පිළිබඳ සාකච්ඡාවක් පැවැත්විනි. එම අවස්ථාවේ මෙම තීරණය ගනු ලැබූ බවයි වාර්තා වන්නේ.
පසුගිය මහ කන්නයේ දී චීන රජය විසින් මෙරට ගොවි ජනතාවට නොමිලයේ බෙදාදීම සඳහා ඩීසල් ලීටර් මිලියන 6.5ක් ලබා දුන් බවත් , කුඩා ප්‍රමාණයේ කුඹුරු වගා කරන ගොවීන් විශාල පිරිසක් තමන්ට හිමි ඉන්ධන කෝටාව ලබා ගැනීමට නොපැමිණීම නිසා ඩීසල් ලීටර් මිලියන 02ක් ඉතිරිව තිබුණ බවත් සදහන් කර අමාත්‍යවරයා පවසා සිටියේ එමනිසා මෙම ඉන්ධන තොගය මෙවර මහ කන්නයේ දී වගා කටයුතු සිදු කිරීමට නොහැකිව සිටින යල කන්නයේ දී වගා හානි සිදුවූ ගොවි ජනතාවට ලබා දීමට තීරණය කල බවයි.
ඒ අනුව එක් ගොවියෙකුට ලීටර් 40ක ප්‍රමාණයක් බැගින් මෙම ඉන්ධන ප්‍රමාණය වගා හානි සිදුවූ සියලු ගොවීන් අතර වහාම බෙදා හැරීමට පියවර ගන්නැයි අමාත්‍ය මහින්ද අමරවීර ඊයේ අදාල සියලු නිලධාරින්ට උපදෙස් දුන්නේය.
ඒ අනුව ඉදිරි දින දෙක තුළ මෙම ඩීසල් තොගය වගා හානි සිදුවූ සියලු ගොවීන්ට බෙදාහැරිමට නියමිතය.
මෙහිදී උඩවලව ජලාශය සිඳී යාම නිසා වගා පාළු වු වළව කලාපයේ ගොවීන්ට ප්‍රමුඛත්වය ලබා දීමට ද තීරණය කළේය. නිසි අවස්ථාවේ දී සමනලවැවෙන් ජලය උඩවළවේ ජලාශයට ජලය ලබා නොදීම නිසා බොහෝ කුඹුරු විනාශ විය. එමනිසා වළව කළාපයේ ගොවීන්ට සිදු වූ හානිය Man Made Disaster එකක් ලෙස සළකා ඔවුන්ට ප්‍රමුඛත්වය ලබා දිය යුතුබවත් ,ගොවීන් සියලු දෙනා රැකබලාගැනීම රජයේ වගකීමක් බවත් අමාත්‍යවරයා සඳහන් කර සිටියා.
-P.M
