මෙතෙක් පාරිභෝගික අධිකාරිය භාණ්ඩවල මිල පාලනයක් නොකළ අතර ඉදිරියේදී දේශීයව නිෂ්පාදනය කරනු ලබන භාණ්ඩ සඳහා උපරිම මිලක් නියම කිරීමට බලාපොරොත්තු වනබව සමූපකාරසේවා, අළෙවි සංවර්ධන හා පාරිභෝගික ආරක්ෂණ රාජ්‍ය අමාත්‍ය ගුණපාල රත්නසේකර සදහන් කර ඇත.
අත්‍යාවශ්‍ය භාණ්ඩ කවරේදැයි නිශ්චිත ලැයිස්තුවක් මෙතෙක් කල් නොතිබීම නිසා භාණ්ඩ වලට උපරිම මිලක් නියම කිරීමට නොහැකිවිය. ඒ අනුව ඉදිරියේදී එවැනි ලේඛනයක් සකසා පාලන මිලක් නියම කිරීමට රජයේ සැලසුමයි.
පවත්නා අර්බුදකාරී වාතාවරණය තුල ජනතාවට සහනයක් ලෙස සහල් මිල ඉහළ යාම වැලැක්වීමට නව ගැසට් පත්‍රයක් මගින් උපරිම මිලක් මේ විටත් නියම කර ඇත. මෙම උපරිම මිල දේශීය වශයෙන් නිෂ්පාදනය කරනු ලබන සහල් සඳහා පමණක් නියම කර තිබේ.
වී අලෙවි මණ්ඩලය විසින් විශේෂ සහනදායී මිලට සපයන සහල් සඳහා උපරිම මිල බල නොපාන බවයි වී අලෙවි මණ්ඩලයේ උප සභාපති දුමින්ද ප්‍රියදර්ශන මහතා පවසා සිටින්නේ.
2015 ට පසු වී අලෙවි මණ්ඩලය එකතුකරගත් ඉහළම අරාක්ෂිත වී තොගය වන මෙට්‍රික් ටොන් 70,000 කට අධික ප්‍රමාණයක් මෙම වසර තුල ලබාගෙන තිබේ. එම වී උත්සව සමය ඉලක්ක කර ගනිමින් අමාත්‍ය මණ්ඩල තීරණ අනුව සතොස,සමූපකාර සහ සුපිරි වෙළෙඳසැල් වෙත රු.140 ක මිලකට සැපයේ. ඒ අනුව අප්‍රේල් මස මුල සිට රුපියල් 145ක මිලකට සතොස, සමූපකාර ජාල වෙතින් සහල් මිලදී ගැනීමට පිළිවන. මෙම අර්බුදකාරී මොහොතේ රජය ගත් මෙම තීරණ ජනතාවට මහගු සහනයක් වනවා ඇත.
-මහේෂි
