ඒ සඳහා ‘රන් පාරාදීස වීසා‘ නමින් වැඩසටහනක් ක්‍රියාත්මක කිරීමට ඇමැති මණ්ඩල අනුමැතිය හිමි වූ බව සම කැබිනට් ප්‍රකාශ, ජනමාධ්‍ය ඇමැති, ආචාර්ය නාලක ගොඩහේවා මහතා පැවසීය.
රජයේ ප්‍රවෘත්ති දෙපාර්තමේන්තුවේ ඊයේ (26) පැවැති කැබිනට් තීරණ දැනුම් දීමේ මාධ්‍ය හමුවේදී ඇමැතිවරයා මේ බව සඳහන් කළේය.
මීට පෙර ක්‍රියාත්මක කරන දීර්ඝකාලීන වීසා නිකුත් කිරීමේ ක්‍රමවේදය වෙනුවට නව ක්‍රමවේදයක් හඳුන්වා දීමට 2021 මාර්තු මස 07 වැනි දින පැවති ඇමැති මණ්ඩල රැස්වීමේදී අනුමැතිය හිමි විය.
එම ක්‍රමවේදය යටතේ දීර්ඝකාලීන වාස වීසා නිකුත් කිරීම සම්බන්ධයෙන් ආරක්ෂක ඇමැතිවරයා ලෙස ජනාධිපති ගෝඨාභය රාජපක්ෂ මහතා ඉදිරිපත් කළ යෝජනාවට ඇමැති මණ්ඩලයේ අනුමැතිය හිමි වූ බව ගොඩහේවා මහතා කියා සිටියේය.
සහාධිපත්‍ය දේපළවල අවම වශයෙන් අමෙරිකානු එක්සත් ජනපද ඩොලර් 75,000ක් හෝ ඊට වැඩි වශයෙන් ආයෝජනය කරනු ලබන විදේශිකයන්ට සහ විදේශීය සමාගම්වල අධ්‍යක්ෂවරුන්ට, ඔවුන්ගේ කලාත්‍රයන්ට සහ යැපෙන්නන්ට එලෙස ආයෝජන කරනු ලබන අමෙරිකන් එක්සත් ජනපද ඩොලර් ප්‍රමාණය මත පදනම්ව අවුරුදු 05 සිට 10 දක්වා දීර්ඝකාලීන වාස වීසා නිකුත් කිරීමට අනුමැතිය හිමිව ඇත.
-අරුණ
