ශ්‍රී ලංකා මහ බැංකුව ඊයේ නිකුත් කළ විනිමය අනුපාත අනුව එක්සත් ජනපද ඩොලරයක ගැනුම් මිල රුපියල් 316.79ක් වූ අතර විකිණුම් මිල රුපියල් 327. 49ක් විය. වෙළෙඳපොළ ආරංචි මාර්ග හෙළි කළ අන්දමට විදෙස් විනිමය හුවමාරු කරන්නන් එක්සත් ජනපද ඩොලරයකට ගෙවූ මිල රුපියල් 350-360 අතර විය.
ඒ අනුව පසුගිය දිනවල විදෙස් විනිමය හුමාරු කරන්නන් එක්සත් ජනපද ඩොලරයකට ගෙවූ මුදල රුපියල් 400 - 420 සිට රුපියල් 350-360 දක්වා පහත වැටී ඇති බව වෙළෙඳපොළ නිරීක්ෂණය කිරීමේදී පැහැදිලි විණි.
පසුගිය සති දෙකක කාලය තුළ රජය ක්‍රියාවට නැංවූ ආර්ථික ප්‍රතිපත්ති සහ විදේශ ප්‍රේෂණ ඉහළ යෑම හේතුවෙන් අමෙරිකානු ඩොලරයේ මිල මෙසේ පහත වැටී ඇති බවත් එම ආරංචි මාර්ග හෙළි කළේය.
එක්සත් ජනපද ඩොලරයට සාපේක්ෂව ශ්‍රී ලංකා රුපියලේ අගය පා කර හැරීමට ශ්‍රී ලංකා මහ බැංකුව මාර්තු මස 10 වැනි දා තීන්දු කළ අතර ඒ සමඟ විදෙස් ගත ශ්‍රී ලාංකිකයන් තමන් උපයන මුදල් මාර්තු මාසයේ සිට නීත්‍යනුකූල මාර්ග ඔස්සේ බැංකුවලට එවීමට පෙළඹී ඇති බවත් වාර්තා වේ.
එසේම අන්තර්ජාතික මූල්‍ය අරමුදලට යෑමට රජය ගත් තීන්දුවත් සමඟ රුපියලේ අගය ශක්තිමත් වීමට පටන් ගෙන ඇත
-පංචාලි
