අප්‍රිකාවේ සිට ඉන්දියාව ඇතුළු රටවල් කරා ගමන් ගන්නා නැව් බොහෝ අවස්ථාවල සේවා ගැනීම සඳහා ඩුබායි හෝ සිංගප්පූරුව වැනි වරායන් වෙත ගමන් කරන නමුත් එම අවස්ථාව කොළඹ වරාය වෙත ලබා ගැනීමට හැකියාව තිබෙන්නේ නම් විශාල විදේශ විනිමයක් උපයා ගැනීමට ශ්‍රී ලංකාවට හැකි බව දකුණු අප්‍රිකාවේ ශ්‍රී ලංකා මහ කොමසාරිස් එස්. අමරසේකර මහතා පවසයි.
ඒ අනුව ශ්‍රී ලංකාවේ සහ දකුණු අප්‍රිකාවේ සිටින නැව් ඒජන්තවරුන් අතර සාකච්ඡා කරන බව කී මහ කොමසාරිස්වරයා එවැනි නැව් වැඩි ප්‍රමාණයක් කොළඹ වරායට ගෙන්වා ගැනීම සම්බන්ධයෙන් අවධානය යොමුකර තිබෙන බවද එය සාර්ථක වී තිබෙන බවද පැවසීය.
මේ අතර ශ්‍රී ලංකාව සහ දකුණු අප්‍රිකාව අතර එළවළු සහ පලතුරු හුවමාරු කර ගැනීමේ වැඩසටහනක් ක්‍රියාත්මක කිරීමට දෙරටේ අවධානය යොමුව තිබෙන බවද ඒ මහතා ප්‍රකාශ කර තිබේ.
-පංචාලි අබේසේකර
