මෙම නගර නවීන නගර ලෙස සංවර්ධනය කිරීමේ සැලසුම් පිළිබඳව අවධානය යොමු කළ අග්‍රාමාත්‍යවරයා , විෂය භාර අමාත්‍යවරයා වශයෙන් අදාළ ව්‍යාපෘති ක්‍රියාත්මක විය යුතු ආකාරය පිළිබඳව අමාත්‍යංශ නිලධාරීන්ට අවශ්‍ය උපදෙස් ලබා දී ඇත.
නවීන වෙළඳ පරිශ්‍රයක්, සියලු පහසුකම් සහිත තොග වෙළෙඳපොළක් සහ සති පොළක්, රථවාහන අංගනයක්, නගර උද්‍යානයක්, නව බස් නැවතුම්පොළක්, බහුකාර්ය ගොඩනැගිල්ලක් මෙන්ම මධ්‍යම පාන්තික නිවාස පරිශ්‍රයකින් සමන්විතව බෙලිඅත්ත නගරය සංවර්ධනය කෙරෙන ආකාරය නාගරික සංවර්ධන හා නිවාස අමාත්‍යංශ නිලධාරීන් විසින් එහිදී පැහැදිලි කරන ලදි.
ද්විත්ව මංතීරු සහිත මාර්ග පද්ධතිය, පිටත සහ ඇතුළත වටරවුම් මාර්ගය මෙන් ම මංතීරු හතරකින් යුතුව මාර්ග පද්ධතිය ඉදිකිරීම පිළිබඳව ද මෙහිදි අවධානය යොමු කෙරිණි.
මත්තල ගුවන්තොටුපළ කේන්ද්‍ර කර ගනිමින් වෙළෙඳ, කර්මාන්ත, නේවාසික පහසුකම්, සංචාරක, සෞඛ්‍ය පහසුකම් මෙන් ම කෘෂි ප්‍රවර්ධන කලාප ඇති කිරීම සහ මත්තල-ලුණුගම්වෙහෙර ආශ්‍රිත ප්‍රදේශයේ ක්‍රියාත්මක සංවර්ධන ව්‍යාපෘති පිළිබඳවත් මෙහි දී අග්‍රාමාත්‍යවරයාගේ අවධානය යොමු විය.
කුරුණෑගල නගරය නවීන නගරයක් ලෙස නිර්මාණය කිරීමත් ඊට අදාළ සංවර්ධන ව්‍යාපෘති පිළිබඳවත් මෙහි දී අගමැතිවරයා විමසා බලා ඇත.. ඒ අනුව සංවර්ධන ව්‍යාපෘති රැසක් කුරුණෑගල නගරය කේන්ද්‍ර කර ගනිමින් ඉදිරියේ දී ක්‍රියාත්මක වනු ඇත.
-පංචාලි අබේසේකර
