2019.11.10 වනදා කොළඹ පැවති මාධ්‍ය සාකච්ඡාවකට සහභාගී වූ අතුල මදනායක සහ සරත් කුමාර යන පුද්ගලයින් හරහා සුදු වෑන් වලින් පුද්ගලයින් පැහැරගෙන ගොස් මරා දැමීම, මංකොල්ලකෑම් ඇතුළු අපරාධ සිද්ධීන් පිළිබඳව අසත්‍ය තොරතුරු ප්‍රකාශකර එවක ජනාධිපති අපේක්ෂක ගෝඨාභය රාජපක්ෂ මහතාට අගතියක් සිදුකිරීමේ අරමුණින් බොරු සාක්ෂි නිර්මාණය කිරීම, ජනාධිපතිවරණයේ ප්‍රතිඵලවලට බලපෑමක් ඇතිවිය හැකි ආකාරයේ දූෂිත ක්‍රියාවක් සිදුකිරීම සම්බන්ධයෙන් දණ්ඩ නීති සංග්‍රහය යටතේ විත්තිකරුවන් දෙදෙනාට එරෙහිව මෙම චෝදනා එල්ලකර තිබේ.
මෙම නඩුව අද කොළඹ මහාධිකරණ විනිසුරු දමිත් තොටවත්ත මහතා ඉදිරියේ කැඳවීය.
එහිදී නියෝජ්‍ය සොලිස්ටර් ජනරාල් දිලීප පිරිස් මහතා අධිකරණයට දන්වා සිටියේ මෙම නඩුවේ සාක්ෂි වශයෙන් ඉදිරිපත්කර ඇති වීඩියෝ දර්ශන උත්පාදනය කළ පරිගණක පද්ධති පරික්ෂා කිරීම සඳහා විත්ති පාර්ශ්වයට අවස්ථාවක් ලබාදී තිබුණත් ඒවා පරික්ෂා කිරීමට විත්තිය විසින් නීතිඥවරයෙකු යොමුකර නොතිබූ බවය.
ඒ අනුව අදාළ පරිගණක පද්ධති පරික්ෂා කිරීම සඳහා මැයි මස 14 වනදා නීතිඥවරයෙකු සහභාගී කරන ලෙස විනිසුරුවරයා විසින් විත්ති පාර්ශවයට නියමකර ඇත.
