කොළඹ 14 සිරිමාවෝ බණ්ඩාරනායක මාවත, එදිරිසිංහ මාවත, ස්ටේඩියම්ගම, සිරිමුතු උයන අසල නිවාස 1000කින් සමන්විත මහල් නිවාස පරිශ්‍රය මෙම නිවාස ව්‍යාපෘතියේ සමාරම්භක පියවර ය.

මෙහි ඉදිකෙරන එක් නිවාසයක ප්‍රමාණය වර්ග අඩි 550කි. ආසියානු යටිතල පහසුකම් සහ සංවර්ධන බැංකුවේ ආධාර යටතේ ඉදිකෙරෙන මෙම මහල් නිවාස පරිශ්‍රය වෙනුවෙන් ආයෝජනය කෙරෙන මුදල රුපියල් මිලියන 5950කි. වසර 03ක් ඇතුළත මෙම මහල් නිවාස පරිශ්‍රයේ ඉදිකිරීම් කටයුතු අවසන් කිරිමට නියමිත අතර නාගරික සංවර්ධන අධිකාරියේ පූර්ණ අධීක්ෂණය යටතේ ඉදිකිරීම් සිදුකරනු ලබන්නේ ඇක්සස් ඉංජිනියරින් සමාගම විසිනි.

කොළඹ නගරයේ පැල්පත්වාසි පවුල් 60, 000ක් වෙනුවෙන් මහල් නිවාස සංකිර්ණ ඉදිකිරීම් කටයුතු ආරම්භ කෙරුණේ ජනාධිපතිවරයා ලෙස කටයුතු කළ ආණ්ඩුවේ රාජ්‍ය ආරක්ෂක සහ නාගරික සංවර්ධන අමාත්‍යංශයේ ලේකම් ලෙස වර්තමාන ජනාධිපති ගෝඨාභය රජපක්ෂ මහතා කටයුතු කළ සමයේ ය.

එම කාලය තුළ නිවාස 20 000ක් පමණ ඉදිකර අවසන් කිරීමට හැකිවිය. පසුගිය වසර කිහිපය තුළ එම වැඩසටහන අඩපණ වී තිබූ අතර යළි කොළඔ පැල්පත්වාසී ජනතාව වෙනුවෙන් නව නිවාස 40,000ක් ඉදිකිරීමේ කටයුතු මැද කොළඹ, උතුරු කොළඹ, බොරැල්ල, දෙමටගොඩ, ඇතුලු ප්‍රදේශ කිහිපයකම ආරම්භ කිරීමට නාගරික සංවර්ධන අධිකාරිය කටයුතු කර ඇත.

-පංචාලි අබේසේකර